საქართველოს პრემიერი, გიორგი გახარია ამბობს, რომ ტყიბულში არსებული პრობლემები, რის გამოც მეშახტეები გაიფიცნენ წლების განმავლობაში გროვდებოდა. ამის შესახებ მან მთავრობის სხდომაზე განაცხადა და პრობლების მოსაგვარებლად ადგილზე ეკონომიკის მინისტრი ნათია თურნავა გაუშვა.

"ყველა ინვესტორმა და დამსაქმებელმა უნდა გაითვალისწინოს, რომ ის ვალდებულია სრულად შეასრულოს როგორც თავისი საფინანსო-სახელფასო ვალდებულებები, ასევე შეუქმნას თითოეულ დასაქმებულს შესაბამისი შრომითი პირობები", — განაცხადა პრემიერმა.

ტყიბულში მეშახტეები ხელფასის მიღების მოთხოვნით 24 სექტემბერს გაიფიცნენ. საქართველოს პროფკავშირების გაერთიანების ინფორმაციით, მეშახტეებს ხელფასი 15 სექტემბრამდე უნდა აეღოთ, თუმცა, მათ კომპანიის პასუხი ამ დრომდე არ აქვთ.

პროფკავშირები მთავრობას მოუწოდებდა, გადაეხადათ ტყიბულელი მეშახტეებისთვის კუთვნილი ანაზღაურება და გაეცნოთ გეგმა, როგორ გააგრძელებს კომპანია ნახშირმოპოვებას.

ტყიბულში მეშახტეებს იგივე პრობლემებს 2018 წელსაც ჰქონდათ. მაშინ დასაქმებულები პრემიერ-მინისტრ მამუკა ბახტაძესთან შეხვედრას მოითხოვდნენ, რათა მათთვის წარედგინათ ოფიციალური დოკუმენტი, რომ ისინი შახტებში გამოძიების დასრულებამდე, ხელფასებს მიიღებდნენ. ტყიბულში 2018 წლის 16 ივლისს მინდელის შახტაში მომხდარ აფეთქებას 4 ადამიანის სიცოცხლე ემსხვერპლა. ამის გამო, საქართველოს შინაგან საქმეთა სამინისტრომ ტყიბულში არსებული 25-ვე შახტი დალუქა. მამუკა ბახტაძემ კი განაცხადა, რომ მინდელის შახტის დახურვის განმავლობაში მეშახტეებს ხელფასები აუნაზღაურდებოდათ.