მამუკა ბახტაძე პრემიერ-მინისტრის პოსტიდან ისე გადადგა, რომ კონკურენციის სააგენტომ მისი დავალება, რის გამო გაძვირდა პური, ვერ შეასრულა. საკითხის შესწავლა სააგენტოს მამუკა ბახტაძემ 2018 წლის 10 დეკემბერს დაავალა. 8 დღეში დავალების გაცემიდამ 9 თვე გავა.

"ამ ეტაპზე კონკურენციის სააგენტო ხორბლისა და პურპროდუქტების ბაზრის მონიტორინგს ახორციელებს. მიმდინარეობს ინფორმაციის დამუშავება", — უთხრეს On.ge-ს სააგენტოში.

კითხვაზე, ბახტაძის გადადგომის შემდეგ გაგრძელდება თუ არა საკითხის შესწავლა, სააგენტოში პასუხობენ: "რა თქმა უნდა".

On.ge მარტში, აპრილში, მაისში, ივნისში, ივლისსა და აგვისტოშიც დაინტერესდა, რა ეტაპზე იყო პურის გაზრდის მიზეზების დადგენის საკითხი. სააგენტოს პასუხი არ შეცვლილა.

10 დეკემბრიდან მაღაზიებში პურის ფასმა, დაახლოებით, 5-10 თეთრით მოიმატა. მთავრობის სხდომის დაწყების წინ პრემიერმა აღნიშნა, რომ ეს შეიძლება, დაკავშირებული იყოს არასამართლიან კონკურენციასთან.

"მინდა შესაბამის ორგანოებს მივმართო, რომ უმოკლეს ვადებში შეისწავლონ ეს სიტუაცია და მოამზადონ ანგარიში, თუ რასთან გვაქვს საქმე. საქართველო არის საბაზრო ეკონომიკა, ჩვენ ვართ ღია ეკონომიკა, მაგრამ არასამართლიანი კონკურენციის კეთების საშუალებას ვერავის მივცემთ", — აღნიშნა მაშინ მამუკა ბახტაძემ.