როგორც თქვენთვის ცნობილია საბერძნეთსა და იტალიაში ყველაზე მეტი ქართველი ემიგრანტი ცხოვრობს, ამის გათვალისწინებით დაიწყო კამპანია "საქართველოს ფოსტა ემიგრანტებისთვის". კამპანიის ფარგლებში საქართველოდან ამ ქვეყნების მიმართულებით ამანათების სახმელეთო გზით გაგზავნის ტარიფი მკვეთრად შემცირდება. ამასთანავე, საქართველოს ფოსტა ემიგრანტებს საშუალებას მისცემს დასაქმდნენ ადგილზე, თავად გასცენ და შეაგროვონ ამანათები და გამოიმუშაონ დამატებითი შემოსავალი. შემდეგ კი, მათი შეგროვებული ამანათების საქართველოში ტრანსპორტირებას და მთელი ქვეყნის მასშტაბით დარიგებას საქართველოს ფოსტა უზრუნველყოფს.

პროექტის ფარგლებში ტარიფი ვრცელდება სახმელეთო ამანათებზე, რომლის მიმდინარე საფასური საბერძნეთის მიმართულებით არი 1კგ. —1,5 ევრო, ხოლო იტალიის მიმართულებით 1კგ. — 2 ევრო. ეს ტარიფი ვრცელდება ნებისმიერი ტიპის შიგთავსის მქონე ამანათებზე.

"ჩვენთვის როგორც ეროვნული საფოსტო ოპერატორისთვის მეტად მნიშვნელოვანია ხელი შევუწყოთ და გავითვალისწინოთ მომხმარებლის მოთხოვნა, სწორედ აქედან გამომდინარე დავიწყეთ პროექტი "საქართველოს ფოსტა ემიგრანტებისთვის", რომლის მიზანია მომხმარებელთა უფლებების დაცვა, საფოსტო უსაფრთხოების უზრუნველყოფა, ხარისხიანი მომსახურების და ხელმისაწვდომი ტარიფის შეთავაზება. ამასთანავე, ემიგრანტების თხოვნის გათვალისწინებით, ამავე პროექტის ფარგლებში საჯარო ინტერესის გამოხატვის ფორმით მათ შევთავაზეთ პარტნიორობა, რასაც, ასევე, საკმაოდ მაღალი ინტერესი მოყვა. ჩვენ შევძელით საოპერაციო ხარჯების ოპტიმიზირება და შედეგად მივიღეთ მომხმარებლისთვის მიმზიდველი დაბალი ტარიფი. პირველ ეტაპზე პროექტის განხორციელება დავიწყეთ საბერძნეთის და იტალიის მიმართულებით, ეტაპობრივად პროექტი გაგრძელდება სხვა ევროპული ქვეყნების მიმართულებითაც", — განაცხადა საქართველოს ფოსტის გენერალურმა დირექტორმა ლევან ჩიკვაიძემ.

აღნიშნული სერვისით სარგებლობა შეგიძლიათ საქართველოს ფოსტის ყველა სერვისცენტრში, მთელი საქართველოს მასშტაბით.