ISFED-მა წინასაარჩევნო პერიოდის მონიტორინგის მეოთხე შუალედური ანგარიში გამოაქვეყნა და განმარტა, რომ სავარაუდოდ პოლიტიკური ნიშნით ოპოზიციური პარტიების წევრებისა და აქტივისტების მიმართ განხორციელებული ზეწოლა-მუქარის შემთხვევები მნიშვნელოვნად გაიზარდა.

ორგანიზაცია განმარტავს, რომ ადგილობრივი თვითმმართველობები მმართველი პარტიის მხარდასაჭერად ადმინისტრაციულ რესურსს იყენებენ, ზოგიერთი მუნიციპალიტეტი კი დასრულებულ პროექტებთან დაკავშირებით მოქალაქეებს სპეციალურ შეტყობინებებს უგზავნის.

ISFED ასევე აცხადებს, რომ წინასაარჩევნო პერიოდში გაგრძელდა პოლიტიკურად აქტიური პირების უკანონო მიყურადების შემთხვევები და მნიშვნელოვანია, რომ საგამოძიებო ორგანოებმა აწარმოონ ეფექტური და მიუკერძოებელი გამოძიება ერთის მხრივ, როგორც ჩანაწერების ავთენტურობის და დანაშაულებრივი განზრახვის რეალურობის დასადგენად, ასევე, უკანონო ფარული მიყურადების დანაშაულის წინააღმდეგ საბრძოლველად.

სამართლიანი არჩევნები ამბობს, რომ ზეწოლა და მუქარა ძირითადად ოპოზიციური საარჩევნო სუბიექტების წარმომადგენელთა მიმართ ხდება და სხვადასხვა ფორმით გამოიხატება. ამასთან გამოვლინდა ოპონენტებისათვის ღონისძიებაში ხელის შეშლის, სააგიტაციო მასალის დაზიანებისა და ქსენოფობიის შემთხვევები:

"საარჩევნო სუბიექტი დავით თარხან-მოურავი, ირმა ინაშვილი - საქართველოს პატრიოტთა ალიანსი წინასაარჩევნო კამპანიაში მკვეთრად გამოხატული ქსენოფობიური მოწოდებებით გამოირჩეოდა".

ორგანიზაციის დაკვირვებით, საანგარიშო პერიოდში გამოვლინდა შემდეგი დარღვევები:

  • სამსახურიდან სავარაუდოდ პოლიტიკური ნიშნით გათავისუფლების 3 ფაქტი
  • ზეწოლა მუქარის 11 ფაქტი
  • ადმინისტრაციული რესურსის გამოყენების 12 ფაქტი
  • კამპანიისთვის ხელის შეშლის 8 ფაქტი
  • ფიზიკური დაპირისპირების 6 ფაქტი
  • ამომრჩევლის სავარაუდო მოსყიდვის 4 ფაქტი
  • პარტიული ოფისის დაზიანების 2 ფაქტი
  • სააგიტაციო მასალების დაზიანების 37 ფაქტი
  • სიძულვილის ენის გამოყენების 4 ფაქტი
  • არაუფლებამოსილი პირის მიერ აგიტაციაში მონაწილეობის 8 ფაქტი.