ადამიანის უფლებების სწავლებისა და მონიტორინგის ცენტრი (EMC) მოითხოვს, რომ მეარაყიშვილს დაუბრუნდეს პირადობის დამადასტურებელი დოკუმენტები და შეწყდეს მისი დევნა. ამის შესახებ EMC-იმ განცხადება გაავრცელა.

ორგანიზაციის ცნობით, მიუხედავად იმისა, რომ თამარ მეარაყიშვილს ყველა ბრალდება მოუხსნეს, დე-ფაქტო პროკურატურას კვლავაც რჩება შესაძლებლობა, ცხინვალის სასამართლოს მიერ მიღებული გადაწყვეტილება გაასაჩივროს. გამოიყენებს თუ არა ის ამ მექანიზმს, ჯერ უცნობია.

"მიუხედავად ორი წლის განმავლობაში ფიზიკური და ეკონომიკური იზოლაციისა, შევიწროვებისა, გადაადგილების თავისუფლების შეზღუდვის და სხვა ფუნდამენტური უფლებების სისტემური დარღვევისა, თამარმა მეორედ შეძლო დაემტკიცებინა პროკურატურის ბრალდებების უსაფუძვლობა. ცხადია, დე-ფაქტო პროკურატურას რჩება ცხინვალის სასამართლოს მიერ მიღებული გადაწყვეტილების ზემდგომ სასამართლო ინსტანციებში გასაჩივრების შესაძლებლობა. ამ მექანიზმს პროკურატურა გამოიყენებს თუ არა, ამ დრომდე უცნობია", — ნათქვამია EMC-ის განცხადებაში.

2019 წლის 6 ივლისს ახალგორის რაიონულმა სასამართლომ, რომელიც ცხინვალის დე-ფაქტო ხელისუფლების დაქვემდებარებაშია, ახალგორელ აქტივისტს, თამარ მეარაყიშვილს ყველა ბრალდება მოუხსნა, რასაც დე-ფაქტო პროკურატურა უკვე ორი წელია ედავება.

ახალგორის რაიონულ სასამართლოში მეარაყიშვილის ბრალდებებთან დაკავშირებით პროცესების მეორე ეტაპი დე-ფაქტო პროკურატურამ 2018 წლის დეკემბრიდან კვლავ დაიწყო, მას მერე რაც 2018 წლის სექტემბერში ახალგორის სასამართლომ საქმე დაუბრუნა არასათანადო გამოძიების და დაუსაბუთებლობის მოტივით.

თამარ მეარაყიშვილს პროკურატურა 2017 წლის აგვისტოდან დევნის რუსეთის ფედერაციის სისხლის სამართლის კოდექსის რამდენიმე მუხლის ფარგელებში. კერძოდ, თამარს ბრალი ედებოდა ცილისწამებაში, რომელიც უკავშირდება მის მიერ ეხო კავკაზაში გამოქვეყნებულ კრიტიკულ ინტერვიუს დე-ფაქტო არჩევნებში გამარჯვებული მმართველი პარტიის წევრების მიმართ.

შემდგომში თამარის მიმართ ბრალდებები დამძიმდა და დე-ფაქტო პროკურატურამ მის წინააღმდეგ გამოძიება დაიწყო რუსეთის ფედერაციის სისხლის სამართლის კოდექსის 327-ე და სისხლის სამართლის კოდექსის 328-ე მუხლით, რომელიც ოფიციალური დოკუმენტის ფალსიფიცირების, ასევე ოფიციალური დოკუმენტების მოტყუებით მიღების გამო სისხლისსამართლებრივი პასუხისმგებლობის დაკისრებას გულისხმობს.

ამ ნაწილში პროკურატურა თამარს ადგილობრივი პირადობის მოწმობის აღების დროს საქართველოს მოქალაქეობის დამადასტურებელი დოკუმენტის არსებობის ფაქტის დამალვაში ედავებოდა, რაც ფაქტობრივად ასევე არ დასტურდებოდა. ცხინვალის რეგიონის დე-ფაქტო რეჟიმის მხრიდან მისი დევნა და შევიწროება საბოლოოდ მიზნად ისახავს მისი, როგორც ქართველი აქტივისტის განდევნას ახალგორიდან.

EMC იცავს თამარის იურიდიულ ინტერესებს საქართველოს საგამოძიებო ორგანოების წინაშე. EMC-ს რამდენიმე მიმართვის შემდეგ, საქართველოს იუსტიციის სამინისტრომ მიიღო გადაწყვეტილება, რომ თამარ მეარაყიშვილის უფლებების დარღვევა გახდეს იმ მეოთხე სახელმწიფოთაშორისი საჩივრის ნაწილი, რომელიც რუსეთის წინააღმდეგ, ადამიანის უფლებათა ევროპულ სასამართლოშია წარდგენილი