ამსტერდამის პირველი ქალი მერი, ფემკე ჰალსემა ქალაქის პოპულარული უბნის, წითელი ფარნების კვარტლის დახურვას, უფრო ზუსტად კი, მის რეფორმირებას აპირებს. ის მიიჩნევს, რომ ქალაქს გაბედულება სჭირდება იმისთვის, რომ წითელი ფარნების ქუჩამ პროსტიტუციის გარეშე იარსებოს.

სექს-მუშაკები ინიციატივას აპროტესტებენ, მათი დამცველები კი ამბობენ, რომ ისინიც ადამიანები არიან, რომლებსაც სამუშაო ადგილი სჭირდებათ. მისი გადატანით კი, მომხმარებლები მოაკლდებათ.

ცოტა ხნის წინ დაარსებულმა ლობისტურმა ჯგუფმა, სახელად Red Light United, განაცხადა, რომ ვიტრინებში მომუშავე 170 სექს მუშაკიდან 90%-მა გამოკითხვისას თქვა, რომ საქმიანობის გაგრძელება ცნობილ ქუჩებზე სურდა.

ამსტერდამი ზაფხულის განმავლობაში განიხილავს, თუ როგორ განხორციელდება ინიციატივა — წითელი ფარნების კვარტალი სექს-მუშაკების გარეშე. რეფორმის ერთ-ერთ მიზეზად ტრეფიკინგი და ტურისტების რაოდენობის შემცირება სახელდება.

"ამ მიზნების დათმობა არ განიხილება. დიდი ხნის განმავლობაში, არსებობდა სენტიმენტალური მოსაზრება მეზღვაურებზე, რომლებიც ამ ქუჩებში თვეები დაცურავდნენ, რის შემდეგაც ტანსრულ, მაღალ ჰოლანდიელ ქალებთან მიდიოდნენ. დღევანდელი სიტუაციით, აქ მყოფი ქალების უმრავლესობა უცხოელია, რომლებზეც არ ვიცით, როგორ მოხვდნენ აქ.

მათ ნებართვის გარეშე უღებენ სურათებს და დასცინიან. ადამიანების ტრეფიკინგი ჩვენი ქალაქის უძველეს და ულამაზეს ნაწილში ხდება. ასწლეულების განმავლობაში შეცვლილი მდგომარეობა დღეს მისაღები აღარაა", — ამბობს ამსტერდამის მერი.

ფოტო: Koen van Weel / Getty Images

ჰალსემა დასძენს, რომ წითელი ფარნების ქუჩაზე განთავსებულ 330 ვიტრინაში მდგარი ქალები ამსტერდამში ჩასული ტურისტების მთავარ ინტერესად იქცა.

ინიციატივა სექს-მუშაკებისთვის ახალი ადგილის გამოყოფას გულისხმობს, თუმცა, მისი განხორციელების შემდეგ, შესაძლოა ბორდელების ვიტრინები აიკრძალოს, ზოგ ქუჩაზე კი ტურნიკეტები დადგან.

ფემკე ჰალსემა ამბობს, რომ პროტესტს ელის, თუმცა დასძენს, რომ ინიციატივის შემდეგ წითელი ხეივნის ქუჩა უფრო მშვიდი, სუფთა და სიცოცხლით სავსე გახდება.