ლეონტი მროველის მიხედვით, ფარნავაზ I ქართლის (იბერიის) პირველი მეფეა ძვ. წ. IV–III საუკუნის I ნახევარში და ფარნავაზიანთა დინასტიის დამაარსებელია. გამეფებისთანავე ფარნავაზს მიეწერება დიდი რეფორმატორული და აღმშენებლობითი საქმიანობა. ასევე, ფარნავაზის სახელთან დაკავშირებულია უდიდესი კულტურულ-საგანმანათლებლო რეფორმა — ქართული დამწერლობისა და მწიგნობრობის დაფუძნება ("ამან შექმნა მწიგნობრობა ქართული").

თუმცა, ვინ იყო ფარნავაზი — რეალური ისტორიული ფიგურა თუ მხოლოდ ლეგენდა? საერთოდ არსებობდა თუ არა ის? როგორ უნდა ვეძებოთ "რეალური ფარნავაზი" შუა საუკუნეების წყაროებსა და მითებში? როდის დაარსდა ქართლის სამეფო და რამდენად შეგვიძლია ვენდოთ ქართულ წყაროებს, რომლებმაც ეს ამბები შემოგვინახეს? რატომ ჩნდება ალექსანდრეს რომანი ფარნავაზის ლეგენდაში? შედგა თუ არა, ქართლის ცხოვრებაში აღწერილი ალექსანდრე მაკედონელის ლაშქრობა კავკასიაში? და რაც ყველაზე მთავარია — რას გვიყვება მცხეთაში ბოლო 100 წლის განმავლობაში ჩატარებული არქეოლოგიური კვლევები და ადასტურებს თუ არა ფარნავაზის არსებობას და დიდ აღმშენებლობას ქართლში ძვ. წ. IV-III საუკუნეში?

მწარე პოდკასტის ეს ეპიზოდი პასუხობს სწორედ ამ და კიდევ მრავალ სხვა მნიშვნელოვან კითხვას. ისტორიკოსი შოთა მათითაშვილი გვესაუბრება ფარნავაზისა და ქართლის დაარსების შესახებ არსებულ მითებსა და რეალობაზე — რეალური ფარნავაზის ძიებიდან დაწყებული, ქართლის სამეფოს შექმნამდე, ზოროასტრიზმის გავლენიდან ქართული მწიგნობრობის დასაწყისამდე.

მწარე პოდკასტი არის ისტორიკოს ნიკა ხოფერიას მიერ დაარსებული პოდკასტი, რომელიც მიმოიხილავს ისტორიას, კულტურას და ცივილიზაციებს. სხვადასხვა დარგის ექსპერტებთან და მკვლევარებთან ერთად, წყაროებზე დაყრდნობით გვიყვება ისტორიის "მწარე" სიმართლეს, რომელიც ხშირად არასწორად, ან საერთოდ არ ვიცით.