ოცნების პრემიერი, ირაკლი კობახიძე ამტკიცებს, რომ ევროინტეგრაცია ღირებულებების დათმობას გულისხმობს. მისი თქმით, ოცნებისთვის "მიუღებელია ასეთი ულტიმატუმები, როდესაც ერთ მხარეს გიყენებენ ტრადიციულ ფასეულობებს, ოჯახურ ღირებულებებს, არასრულწლოვანთა ინტერესებს და მეორე მხარეს ევროინტეგრაციას".

ჟურნალისტის კითხვაზე, რომელიც ოჯახური ღირებულებების და გამჭვირვალობის შესახებ კანონების გაუქმებასთან დაკავშირებით პლებისციტის ჩატარებაზე "ნეიტრალური საქართველოს" ინიციატივას შეეხებოდა, კობახიძემ აღნიშნა, რომ გამოკითხვა ნებისმიერ თემაზე შეიძლება ჩატარდეს.

"არ ვიცი კონკრეტულად ამ საკითხთან დაკავშირებით მე არ მაქვს პოზიცია. ზოგადად საზოგადოებას უნდა ვკითხოთ, პირველ რიგში, ყველაფერი, როდესაც მიიღება გადაწყვეტილებები, თუმცა ამ კონკრეტულ თემაზე გამიჭირდება დღეს რაიმე კომენტარის გაკეთება", — განაცხადა ირაკლი კობახიძემ.

შეგახსენებთ, რომ ოცნების ხელისუფლების მხარდამჭერმა პარტია ნეიტრალურმა საქართველომ ოცნებას მიმართა, რომ "მოახლოებულ თვითმმართველობის არჩევნებთან ერთად ჩატარდეს პლებისციტი, რომელშიც ქართველი ხალხის წინაშე დასმული იქნება კითხვა — ხართ თუ არა მომხრე, ლგბტ პროპაგანდის ხელშეწყობისა და ერთსქესიანთა ქორწინების დაკანონების სანაცვლოდ მოხდეს ქვეყნის ევროკავშირში გაწევრიანება".