ჩეხეთის საგარეო საქმეთა მინისტრმა იან ლიპავსკიმ ალასკაში პუტინი-ტრამპის შეხვედრის შემდეგ რუსეთის პრეზიდენტის განცხადებებს "პროპაგანდისტული სისულელე" უწოდა.

"მივესალმები იმ ფაქტს, რომ პრეზიდენტი ტრამპი ცდილობს ომის შეჩერებას, რომ ის მუდმივად ურთიერთობს ევროპელ წარმომადგენლებთან ამის შესახებ და რომ ის გვაცნობებს ჩვენ ევროპაში, მათ შორის პრეზიდენტ ზელენსკის, დღევანდელი მოლაპარაკებების შედეგების შესახებ. პუტინმა იგივე პროპაგანდისტული სისულელეები წარმოთქვა "კონფლიქტის ფესვებზე", რასაც მისი სახელმწიფო ტელევიზია ქადაგებს", — დაწერა ჩეხეთის საგარეო საქმეთა მინისტრმა სოციალურ ქსელებში.

"პრობლემა რუსული იმპერიალიზმია და არა უკრაინელების თავისუფლად ცხოვრების სურვილი", — დასძინა ლიპავსკიმ. "პუტინი რომ სერიოზულად ეკიდებოდა სამშვიდობო მოლაპარაკებებს, ის დღეს მთელი დღე უკრაინას არ დაესხმებოდა თავს", — შეაჯამა დიპლომატმა.

პარასკევს, 15 აგვისტოს, რუსეთის მიერ უკრაინაში შეჭრის შემდეგ, ალასკაში აშშ-სა და რუსეთის პრეზიდენტებს შორის პირველი შეხვედრა გაიმართა. დონალდ ტრამპმა და ვლადიმერ პუტინმა მოლაპარაკებები ანკორიჯში, ელმენდორფ-რიჩარდსონის საჰაერო ბაზაზე გამართეს.

რუსეთის პრეზიდენტ ვლადიმერ პუტინთან შეხვედრის შემდეგ, აშშ-ის პრეზიდენტმა დონალდ ტრამპმა FoX News-თან განაცხადა, რომ დღეს "10-დან 10-ით" აფასებს.

ტრამპმა განაცხადა, რომ იწყება მზადება რუსეთისა და უკრაინის ხელმძღვანელების შეხვედრისთვის. მისივე თქმით, შეთანხმების მიღწევის ალბათობა "საკმაოდ მაღალი" უწოდა და აღნიშნა, რომ ეს ახლა ვოლოდიმირ ზელენსკიზეა დამოკიდებული.

ალასკაში პუტინი-ტრამპის შეხვედრის შემდეგ გამართულ პრესკონფერენციაში რუსეთის პრეზიდენტმა დაადასტურა, რომ ტრამპის პრეზიდენტობის შემთხვევაში 2022 წელს უკრაინაში ომი არ დაიწყებოდა.

"დღეს ჩვენ გვესმის პრეზიდენტ ტრამპის ნათქვამი: "მე რომ პრეზიდენტი ვიყო, ომი არ იქნებოდა". ვფიქრობ, რომ ეს არის ის, რაც სინამდვილეში მოხდებოდა. ამას ვადასტურებ, რადგან, საერთო ჯამში, პრეზიდენტ ტრამპთან ერთად ძალიან კარგი, საქმიანი და ნდობის კონტაქტი დავამყარეთ", — განაცხადა პუტინმა.

მისივე თქმით, რუსეთი "ყოველთვის მიიჩნევდა და მიიჩნევს უკრაინელ ხალხს ძმებად".

პუტინმა აღნიშნა, რომ "მოლაპარაკებები კონსტრუქციულ და ურთიერთპატივისცემის ატმოსფეროში წარიმართა, ძალიან საფუძვლიანი და სასარგებლო იყო".