მოსამართლე თამარ მჭედლიშვილმა პროევროპულ აქციებში მონაწილეობისთვის, ნარკოდანაშაულის ბრალდებით დაკავებული თედო აბრამოვი უდანაშაულოდ ცნო.

"პოლიციელების ჩვენებები არ არის პრეზუმფცია და არ შეიძლება მათი ჩვენებების ერთმნიშვნელოვნად გაზიარება," — თქვა მოსამართლე მჭედლიშვილმა განაჩენის გამოცხადებამდე.

გიორგი ახობაძის საქმის მსგავსად თედო აბრამოვის საქმეში არ არსებობდა მისი ჩხრეკის ამსახველი ვიდეო მტკიცებულება და ნეიტრალური მოწმე, რაც დაადასტურებდა ბრალდებას.

"მოსამართლე რას ამბობდა, არ მესმოდა, ხალხის ხმა რომ გავიგე, მერე მივხვდი, რომ გამათავისუფლეს. მადლობას გიხდით ყველას, ვინც იქ იდექით ჩემს გვერდით, ვისთან ერთადაც ვსაუბრობდით და ვმსჯელობდით, რა შეიძლება მომხდარიყო, როგორ შეიძლება შევცვალოთ ვითარება ამ ქვეყანაში, სასწრაფოდ არის გამოსასწორებელი [ვითარება].

ჩვენს გარდა, იქით, შიგნით არიან ათობით, ასობით და ათასობით დაკეტილი ადამიანები, რომლებიც მოსამართლეებს ჰყავთ უდანაშაულოდ გამოკეტილი. ჩვენ დაგიხსნით თქვენ.

აქ ვინც ხართ, დაიმახსოვრეთ, რომ ხართ ერთით მეტი, მეც თქვენთან ერთად ვარ," — განაცხადა თედო აბრამოვმა.

დეკემბერში, პროევროპულ აქციაზე მიმავალი 22 წლის თედო აბრამოვი დააკავეს. პროკურატურა მას 4.41548 გრამი MDMA-ის ფლობას ედავებოდა, რაც 9-დან 20 წლამდე ან უვადო პატიმრობას ითვალისწინებს.