აშშ-ის პრეზიდენტ დონალდ ტრამპს უკრაინის პრეზიდენტ ვოლოდიმირ ზელენსკისთან Air Force One-ის ბორტზე ხანგრძლივი სატელეფონო საუბარი ჰქონდა. ამის შესახებ Sky News თეთრი სახლის განცხადებაზე დაყრდნობით იუწყება.

თეთრი სახლი ასევე იტყობინება, რომ ტრამპი ზელენსკისთან საუბრის შემდეგ NATO-ს ლიდერებს ტელეფონით ესაუბრა.

უკრაინული მედია წერს, რომ ზელენსკის და ტრამპს შორის სატელეფონო საუბარს ასევე ესწრებოდნენ ევროკომისიის ხელმძღვანელი ფონ დერ ლაიენი, საფრანგეთის პრეზიდენტი ემანუელ მაკრონი, გერმანიის კანცლერი ფრიდრიხ მერცი, ფინეთის პრეზიდენტი ალექსანდრ სტუბი, პოლონეთის პრეზიდენტი კაროლ ნავროცკი, ბრიტანეთის პრემიერმინისტრი კირ სტარმერი, NATO-ს გენერალური მდივანი მარკ რუტე, აშშ-ის სახელმწიფო მდივანი მარკო რუბიო და აშშ-ის სპეციალური წარმომადგენელი სტივ ვიტკოფი.

პარასკევს, 15 აგვისტოს, რუსეთის მიერ უკრაინაში შეჭრის შემდეგ, ალასკაში აშშ-სა და რუსეთის პრეზიდენტებს შორის პირველი შეხვედრა გაიმართა. დონალდ ტრამპმა და ვლადიმერ პუტინმა მოლაპარაკებები ანკორიჯში, ელმენდორფ-რიჩარდსონის საჰაერო ბაზაზე გამართეს.

The Times აღნიშნავს, რომ აშშ-ის პრეზიდენტ დონალდ ტრამპსა და რუსეთის ლიდერ ვლადიმერ პუტინს შორის დიდი ხნის ნანატრი შეხვედრა მოსალოდნელი გარღვევის გარეშე დასრულდა. შეხვედრის ღიმილით, ხელის ჩამორთმევითა და წითელი ხალიჩით საზეიმო დაწყების მიუხედავად, მხარეები ვერ შეთანხმდნენ უკრაინაში ცეცხლის შეწყვეტაზე ან შემდეგი სამიტის ადგილმდებარეობაზე.

CNN წერს, რომ შეხვედრის შედეგად პუტინმა ორი უზარმაზარი უპირატესობა მიიღო - რეაბილიტაცია და დამატებითი დრო.