NEWS.On.ge-ის ფოტორეპორტიორი ტბელ აბუსერიძე საერთაშორისო ფოტოკონკურსის — Vilnius Photo Circle-ს ფინალისტია. მისი ფოტოსერია — "მთაო! დროისგან დახარჯულო" (Ah Mountain! Weary of Time) წელს კონკურსზე Highlight Award-ის კატეგორიაში მოხვდა, რომელიც 30 წლამდე ფოტოგრაფებისთვისაა განკუთვნილი.

წლევანდელი ფესტივალის თემა "გზაჯვარედინებს" ეძღვნებოდა და იწვევდა ფოტოპროექტებს, რომლებიც გეოპოლიტიკური, კულტურული და იდეოლოგიური გზაჯვარედინების შესახებ მოგვითხრობდნენ.

"მთაო! დროისგან დახარჯულო" ჰქვია პროექტს, რომელიც ეძღვნება მაღალმთიან აჭარას. კერძოდ კი ჩემი მთის — "ნაცარას" გაქრობას და ტენდენციას, რომლის მიხედვითაც ქრება მაღალმთიანი აჭარის კულტურა", — ამბობს ტბელ აბუსერიძე.

ტბელ აბუსერიძის ფოტო პროექტიდან: "მთაო! დროისგან დახარჯულო"

ტბელ აბუსერიძის ფოტო პროექტიდან: "მთაო! დროისგან დახარჯულო"

კატეგორიის ჟიურიმ, რომელშიც შედიოდნენ ფილიპ ბლენკინსოპი, მარიკა ჩუკროვსკი, არტურას მოროზოვასი, დინა ოგანოვა და ბრუს სტრონგი, დაახლოებით 50 ნამუშევარი განიხილა და სამი საუკეთესო შეარჩია.

Vilnius Photo Circle წელს სამ კატეგორიაში ტარდება — Vilnius Photo Circle Award, Highlight Award და Lietuva. ფინალისტების ნამუშევრები გამოიფინება ვილნიუსის ენერგეტიკისა და ტექნოლოგიების მუზეუმში, დაიბეჭდება ფესტივალის ყოველწლიურ ჟურნალში და გამოქვეყნდება ოფიციალურ ვებგვერდსა და სოციალურ ქსელებში.

27-29 სექტემბერს გამარჯვებულები ფესტივალის ფარგლებში სპეციალური პრიზებით დაჯილდოვდებიან.