ორი ქართველი მორაგბე, რომლებიც რუსულ კლუბ სლავაში თამაშობდნენ ლელოს დადების დროს სოლიდარობის ჟესტის გამო კლუბიდან გარიცხეს. საბა ილურიძემ და რეზი ბროძელმა თამაშის დროს თვალზე ხელი აიფარეს, რაც საქართველოში განვითარებული მოვლენებისა და აქციების ერთგვარ სიმბოლოდ იქცა.

საბა ილურიძე On.ge-სთან ამბობს, რომ მატჩი დაახლოებით ერთი კვირის წინ ჩატარდა, სოლიდარობის ჟესტის შემდეგ კი გუნდიდან და ჩემპიონატიდან მოკვეთეს.

"ჩემი რუსეთში ყოფნის დროს ჩემი ხალხის წინააღმდეგ ბევრი არასასიამოვნო რამ მოხდა, მე მხარდაჭერა გამოვუცხადე, რის გამოც მომკვეთეს ჩემპიონატიდან", — ამბობს მორაგბე და ამატებს, რომ უკვე საქართველოში ბრუნდება.

"ცალი თვალითაც გხედავ" — სწორედ ამ მესიჯს ატარებს ჟესტი, რომელიც უკვე არაერთმა სპორტსმენმა გამოიყენა. გორის დილას ფეხბურთელმა, გურამ გოშთელიანმა ვიტ ჯორჯიასთან გატანილი გოლი სოლიდარობის ჟესტით აღნიშნა. იგივე ჟესტი გამოიყენა ლოკომოტივის ფეხბურთელებმა, ოთარ კობახიძემ და დავით ჯიქიამ, როდესაც მატჩზე გოლის გატანა აღნიშნეს. მორაგბე თედო აბჟანიძემ კი თვალზე ხელი გარდასახვის გატანის შემდეგ აიფარა.

რუსეთში პროსახელისუფლებო მედიაში ამ ჟესტს ანტირუსულს უწოდებენ. ერთ-ერთი მატჩის დროს ანტისაოკუპაციო მაისურების ჩაცმისთვის, რუსმა დეპუტატმა FIFA-ს ქართველი ფეხბურთელების დასჯა მოსთხოვა.