რაგბისა და ფეხბურთის მატჩებზე ქართველმა სპორტსმენებმა 20 ივნისის აქციაზე დაშავებულებსა და თბილისში მიმდინარე პროტესტის მონაწილეებს მხარდაჭერა გამოუცხადეს. გოლისა და გარდასახვის აღნიშვნის შემდეგ სპორტსმენებმა ცალ თვალზე ხელი აიფარეს, რაც ბოლო რამდენიმე დღეა პროტესტის სიმბოლოდ იქცა.

თბილისის ლოკომოტივისა და რუსთავის მატჩზე გოლი ამ ჟესტით აღნიშნეს ლოკომოტივის ფეხბურთელებმა, ოთარ კობახიძემ და დავით ჯიქიამ.

"ცალი თვალითაც გხედავთ", — წერს ჯიქია ფეისბუქზე.

20 წლამდელთა თამაშზე კი თედო აბჟანდაძემ აიფარა თვალზე ხელი გარდასახვის გატანის შემდეგ.

გარდა ამისა, დღეს ქუთაისის ტორპედოსა და თბილისის ლოკომოტივის ფეხბურთელებმა მატჩებზე ანტიოკუპაციური მაისურები ჩაიცვეს.

20 ივნისს სპეცრაზმმა აქცია დაშალა. შედეგად ასეულობით ადამიანი დაშავდა 2-მა კი თვალი დაკარგა. სწორედ მომხდარის გასაპროტესტებლად რამდენიმე დღეა პარლამენტთან საპროტესტო აქციები მიმდინარეობს.