12 სექტემბერს, 12:00 საათზე, კრწანისის ტყე-პარკის შესასვლელთან საპროტესტო აქცია "დაიცავი კრწანისი" გაიმართება. ამის შესახებ ინფორმაციას პლატფორმა "ერთი ხალხი — ერთი საქართველო" ავრცელებს.

აქციის ორგანიზატორების მიერ გავრცელებულ ინფორმაციაში ნათქვამია, რომ "Eagle Hills-ის პროექტში ქართული არაფერია. ეს პროექტი უცხოელებისთვისაა შექმნილი, მათ შორის, მათთვის საქართველოში მუდმივი ბინადრობის უფლების გასაცემად".

"კრწანისის ბრძოლის 231-ე წლისთავზე, ჩვენი წინაპრების მემკვიდრეობა კვლავ დასაცავია. 12 სექტემბერს, დღის 12 საათზე, კრწანისის ტყე-პარკთან ვიკრიბებით და ვამბობთ: საქართველოს მიწა ქართველ ხალხს ეკუთვნის! მოვითხოვთ გაუქმდეს Eagle Hills-თან დადებული ხელშეკრულება.

Eagle Hills-ის პროექტში ქართული არაფერია. ეს პროექტი უცხოელებისთვისაა შექმნილი, მათ შორის, მათთვის საქართველოში მუდმივი ბინადრობის უფლების გასაცემად. პროექტის გარშემო აღმართული დიდი ღობე ფიზიკურად ყოფს საქართველოს მოქალაქეებს სხვა, უცხო კულტურის იზოლირებული სივრცისგან.

ჩვენ ზოგადად არ ვეწინააღმდეგებით ინვესტიციებს, მაგრამ ეს არ არის ინვესტიცია. მსგავსი რამ არაერთხელ გვინახავს: მასშტაბურ უცხოურ პროექტებს გვპირდებიან, შემდეგ კი საკუთარი მუშახელი ჩამოჰყავთ, რამდენიმე ადამიანი მდიდრდება და საქართველოს რიგითი მოქალაქე კი იჩაგრება — რჩება სამსახურის და მიწის გარეშე. ოჯახებს აიძულებენ, საკუთარი მიწა დათმონ — როგორც ამას ახლა რუსთავში აკეთებენ. ასეთი ოჯახები კი შემდეგ იძულებულები ხდებიან საკუთარი ქვეყანა დატოვონ ლუკმა პურის ძიებაში. ეს უნდა შეჩერდეს.

ამიტომ, 12 სექტემბერს, 12 საათზე, კრწანისის ტყე-პარკთან უნდა გამოვიდეთ და ერთხმად ვთქვათ: ხელები შორს ქართული მიწისგან!", — წერია გავრცელებულ განცხადებაში.