ჰონგ-კონგში დემონსტრანტები ადგილობრივი პარლამენტის შენობაში შეიჭრნენ. ეს ჩინეთის შემადგენლობაში ჰონგ-კონგის დაბრუნების 22 წლისთავზე, პირველ ივლისს მოხდა. დემონსტრანტებმა შენობაში რამდენიმე საათი გაატარეს, რის შემდეგაც პოლიციამ ისინი ცრემლსადენი გაზითა და ძალის გამოყენებით დაშალა. დაკავებულების შესახებ ინფორმაცია არ ვრცელდება.

დემონსტრანტებმა საკანონმდებლო ორგანოს შენობის შუშის კარები ჩაამტვრიეს, დააზიანეს ავეჯი და კედლებზე საპროტესტო ლოზუნგები დატოვეს. მათ იარაღად საგზაო ნიშნები და რკინის ე.წ. არმატურები გამოიყენეს. მათ პარლამენტის სპიკერების პორტრეტებს საღებავი გადაასხეს. დემონსტრანტებმა სხდომათა დარბაზში ის დროშა გამოფინეს, რომელიც ბრიტანეთის კოლონიად ყოფნის დროს გამოიყენებოდა. სწორედ ეს დროშა გახდა პროტესტის ერთ-ერთი მთავარი სიმბოლო.

ფოტო: Getty Images

ფოტო: Getty Images

ფოტო: AP

ფოტო: Getty Images

ფოტო: Getty Images

უკვე რამდენიმე კვირაა ჰონგ-კონგის ქუჩაში ათასობით ადამიანი გამოდის. ისინი ექსტრადიციის ახალი კანონის წინააღმდეგ გამოდიან, რომელიც უფლებას აძლევს ბრალდებულები იმ იურისდიქციებს გადასცენ, რომელთაც ჰონგ-კონგს, როგორც ავტონომიურ ერთეულს ექსტრადიციის შესახებ შეთანხმება გაფორმებული არ აქვს.

1997 წელს ჰონგ-კონგი ბრიტანული კოლონიიდან ჩინეთის სახალხო რესპუბლიკას დაუბრუნდა, თუმცა ბოლო დრომდე მნიშვნელოვან ავტონომიას ინარჩუნებდა — ერთი ქვეყანა, ორი სისტემა. აქტივისტების დიდი ნაწილი ამბობს, რომ ექსტრადიციის შესახებ კანონი ჩინეთზე დამორჩილებისკენ გადადგმული ნაბიჯია.

აქციების დაწყებისა და პოლიციასთან შეტაკებების შემდეგ ჰონგ-კონგის ადმინისტრაციის ხელმძღვანელმა განაცხადა, რომ კანონპროექტზე მუშაობას განუსაზღვრელი ვადით გადადებდნენ. ოპოზიციამ ეს მხოლოდ ტაქტიკურ ნაბიჯად აღიქვა და კანონპროექტზე საბოლოოდ უარის თქმას ითხოვს.

ჩინეთის სახალხო რესპუბლიკის ხელისუფლება ამბობს, რომ დემონსტრანტები უცხოეთიდან წამოსული მითითებებით მოქმედებენ. გარდა ამისა, მათ დასავლური ქვეყნები შიდა საქმეებში ჩარევაში დაადანაშაულა მას შემდეგ, რაც აშშ-მ და დიდმა ბრიტანეთმა ჩინეთს ადამიანის უფლებების პატივისცემისკენ მოუწოდეს.