რუსთავი 2-მა 29 სექტემბერს გაავრცელა ინფორმაცია, რომ ევროსასამართლომ საქართველოდან წარდგენილი მოსამართლეობის კანდიდატები არ დაამტკიცა. თუმცა, როგორც On.ge-ს TI-ის პროგრამების მენეჯერმა, გია გვილავამ აუხსნა, ამ ეტაპზე ევროსასამართლოს არცერთ კანდიდატზე უარი არ უთქვამს, ანუ პროცესი არ ჩაშლილა და კანდიდატები არ დაუბლოკავთ.

გვილავას განმარტებით, მომხდარი შესაძლოა იყოს გარკვეული მითითება ევროსასამართლოს მიერ, რომ კომისია აღნიშნული კანდიდატებით, ან მათი შერჩევის პროცესში გამოკვეთილი ხარვეზებითაა უკმაყოფილო:

"სასამართლომ უბრალოდ გადადო, არ განიხილა ის კანდიდატები, რომლებიც წარუდგინა ჩვენმა სახელმწიფომ. ნამდვილად არ არის სასიამოვნო შემთხვევა. ცალსახად ეს არ არის ჩაშლა, მაგრამ მესიჯია ხელისუფლების მიმართ, რადგან მსგავსი ტიპის გადადება და შეფერხებები არ ხდება ხოლმე. ბოლოს, მგონი, აზერბაიჯანთან მიმართებით იყო და იქაც გარკვეული ქვეტექსტი არსებობდა. ჩვენ ერთადერთ რეალურ ვარიანტად მიგვაჩნია ის, რომ შესაძლოა, თავად კანდიდატებში იყოს პრობლება. თუმცა, ამ ეტაპზე რადგან პროცესი გადაიდო, არ შეწყდა და კონკრეტული გადაწყვეტილება არ ვიცით კომისიისგან, ვერ ვიტყვით, რომ კანდიდატები ჩავარდნილია".

გვილავას თქმით, კონკრეტულად როდისთვის გადაიდო აღნიშნული პროცესი, ჯერ უცნობია, თუმცა ეს ინფორმაცია იანვარში გასაჯაროვდება.

რაც შეეხება ხელისუფლების მიერ ახალი კანდიდატების წარდგენას, მან აგვიხსნა:

"თუ შემდეგ დაიბლოკებიან ეს კანდიდატები, მაგალითად, ყველა თუ დაიბლოკა, ხელისუფლებას თავიდან მოუწევს კანდიდატების გაგზავნა. თუ რამდენიმე დაიბლოკა, ჩანაცვლება მოუწევთ. შესაბამისად, ხელისუფლება წარადგენს ახალ კანდიდატებს".

ევროსასამართლოს მოსამართლეობის კანდიდატები არიან ევა გოცირიძე, ალექსანდრე ბარამიძე და გიორგი ბადაშვილი. როგორ TI ამბობს:

• ევა გოცირიძე 2013 წლიდან იუსტიციის უმაღლესი საბჭოს წევრია. ის 2015 წელს გირგვლიანის საქმის ერთ-ერთი მოსამართლის, ლევან მურუსიძის სააპელაციო სასამართლოში არჩევას უჭერდა მხარს. ამასთან, ის ამბობდა, რომ რუსთავი 2-ის საქმის განმხილველი კოლეგიის მოსამართლეებზე გაკეთებული განცხადებები ზიანს აყენებდა ქვეყნის დემოკრატიულობასა და სასამართლოს. გოცირიძე ასევე აცხადებდა, რომ მართლმსაჯულების დასაცავად შეიძლება გამოხატვის თავისუფლების შეზღუდვა და სასამართლოშიც და მედიაშიც თავისუფლება ვულგარულად ესმით.
• ალექსანდრე ბარამიძე 2012 წლიდან იუსტიციის მინისტრის პირველი მოადგილეა. 2011-2012 წლებში სანდრო ბარამიძე იურიდიულ მომსახურებას უწევდა, პოლიტიკურ კოალიცია ქართულ ოცნებას. აღსანიშნავია, რომ სტრასბურგის სასამართლოში საქართველოდან წარდგენილი მოსამართლის შესარჩევ სამთავრობო კომისიას იუსტიციის მინისტრი თავმჯდომარეობდა.
• იუსტიციის სამინისტროს ინფორმაციით, გიორგი ბადაშვილი 8 წელია ადამიანის უფლებათა ევროპული სასამართლოში იურისტის პოზიციაზე მუშაობს.