ამერიკის შეერთებული შტატების პრეზიდენტმა ბარაკ ობამამ 23 თებერვალს კონგრესს გუანტანამოს ციხის დახურვის გეგმა გადაუგზავნა.

გეგმის მიხედვით, 30-დან 60-მდე პატიმარს გუანტანამოს ციხიდან აშშ-ს ტერიტორიაზე განთავსებულ საპატიმროებში გადმოიყვანენ, ხოლო 91 პატიმარი სხვადასხვა ქვეყანაში გაიგზავნება სასამართლოს წინაშე წარსადგომად.

ბარაკ ობამა ჯერ კიდევ პრეზიდენტად არჩევამდე საუბრობდა ამ ციხის დახურვაზე. თუმცა ამერიკის საკანონმდებლო ორგანოში მის ამ გადაწყვეტილებას დღემდე ეწინააღმდეგებიან.

"პრეზიდენტ ბუშს უნდოდა ამ ციხის დახურვა, მაგრამ ვერ შეძლო." განაცხადა ობამამ. "არც მე და არც ჯო (ბაიდენი) კენჭს აღარ ვიყრით, შესაბამისად ჩვენ პოლიტიკური ტვირთისგან თავისფულები ვართ. მოგვეცით საშუალება დავხუროთ ამერიკის ისტორიის ეს თავი და შემდეგი პრეზიდენტი გავათავისუფლოთ ამ სიმძიმისგან." თქვა მან.

პრეზიდენტის თქმით, უცხოელ კოლეგებთან და საერთაშორისო ორგანიზაციებთან ყოველი შეხვედრისას მას გუანტანამოს თემაზე, კონკრეტული პატიმრებისა და ციხეში შექმნილი პირობების შესახებ ესაუბრებიან.

თეთრი სახლის ადმინისტრაცია კონგრესს თანამშრომლობისკენ მოუწოდებს, წინააღმდეგ შემთხვევაში პრეზიდენტი ციხის დახურვას აღმასრულებელი ბრძანებით გეგმავს.

პენტაგონის პრეს-მდივნის პიტერ კუკის თქმით, ციხის დახურვით აშშ შეამცირებს ხარჯებს, აამაღლებს სახელმწიფო უსაფრთხოებას და ტერორისტებს მოუსპობს პროპაგანდის ერთ-ერთ მთავარ იარაღს.