ევროპული ფეხბურთის ასოციაციების კავშირის ყოფილი პრეზიდენტი (UEFA), მიშელ პლატინი გაათავისუფლეს. ის 18 ივნისს 2022 წლის მსოფლიო ჩემპიონატის მასპინძელი ქვეყნის არჩევისას სავარაუდო კორუფციული გარიგების საქმეზე დააკავეს. როგორც AFP წერს, პლატინი მრავალსაათიანი დაკითხვის შემდეგ გაათავისუფლეს.

პლატინის ადვოკატმა, უილიამ ბურდონმა განაცხადა, რომ მისი დაცვის ქვეშ მყოფისთვის რამე ბრალდება არ წარუდგენიათ. თვითონ პლატინიმ კი აღნიშნა, რომ ბევრი ფაქტი, რასაც დაკითხვის დროს ეკითხებოდნენ, მისთვის უცნობი იყო. გარდა ამისა, ადვოკატმა დააზუსტა, რომ პლატინი დაპატიმრებული არ იყო, ის ჩვენების მიცემისთვის დააკავეს.

ყატარმა 2022 წელს მსოფლიო ჩემპიონატის ჩატარების უფლება 2010 წელს მიიღო. ამავე წელს განისაზღვრა, რომ რუსეთი 2018 წლის მსოფლიო ჩემპიონატს უმასპინძლებდა. ყატარის არჩევამ ფეხბურთის გულშემატკივრების დიდი გაკვირვება გამოიწვია. ისინი ისეთ ფაქტებზე აპელირებდნენ, როგორიცაა სტადიონებზე ადგილობრივი გულშემატკივრების ნაკლებობა, განსაკუთრებით ცხელი ზაფხული და ეროვნული ნაკრების ცუდი ასპარეზობა. გარდა ამისა, ბევრი ყატარში ადამიანის უგულებელყოფილ უფლებებზე ამახვილებდა ყურადღებას.

ამის შემდეგ მედიაში კორუფციულ გარიგებაზე ხშირად საუბრობდნენ. FIFA-მ კორუფციული კვალის გამოვლენის მიზნით დამოუკიდებელ კომისიას გამოძიების ჩატარება დაავალა. გამოძიების შედეგებით კორუფციულ გარიგებას ადგილი არ ჰქონია.

2015 წელს ფიფას მაღალი თანამდებობის რამდენიმე პირი დააკავეს. დაკავება 2018 და 2022 წლებში მასპინძელი ქვეყნის არჩევისას სავარაუდო კორუფციულ გარიგებას ეხებოდა.

მიშელ პლატინი უეფას პრეზიდენტის თანამდებობას 2007-დან 2015 წლამდე იკავებდა. 2015 წელს ის და ფიფას ყოფილი პრეზიდენტი, იოზეფ ბლატერი საფეხბურთო საქმიანობას რვა წლით ჩამოაშორეს. შემდგომში ეს შეზღუდვა ოთხ წლამდე ჩამოვიდა. ბლატერს ადანაშაულებდნენ იმაში, რომ 2011 წელს მან მიშელ პლატინის უკანონოდ ორი მილიონი შვეიცარული ფრანკი გადაურიცხა. ორივე მათგანი ბრალდებას უარყოფს.