ისრაელის ისტორიაში ერთ–ერთი ყველაზე გამორჩეული პოლიტიკური ფიგურა შიმონ პერესი 93 წლის ასაკში გარდაიცვალა. გარდაცვალების მიზეზი გულის შეტევა გახდა, რომელიც პერესს 2 კვირის წინ დაემართა.

შიმონ პერესი მნიშვნელოვანი როლი შეასრულა 1948 წელს ისრაელის სახელმწიფოს ჩამოყალიბებაში. ის იმ დროისათვის არმიაში მსახურობდა. მოგვიანებით, მან ქვეყნის პრეზიდენტის პოსტზე ერთი, ხოლო პრემიერმინისტრის პოსტზე ორი ვადით იმსახურა.

შიმონ პერესი ისრაელელ პოლიტიკოსებს შორის იმითაც გამოირჩეოდა, რომ ის იყო მომხრე პალესტინელებთან მშვიდობიანი თანაცხოვრებისა. მან 1994 წელს მშვიდობის დარგში ნობელის პრემიაც კი მიიღო.

შიმონ პერესი 1923 წელს პოლონეთში დაიბადა. 1959 წელს ის პირველად აირჩიეს ისრაელის საკანონმდებლო ორგანოში, ქნესეთში, მას შემდეგ კი მრავალი წლის განმავლობაში ქვეყნის მმართველ ორგანოებში მუშაობდა და მნიშვნელოვანი წვლილი შეიტანა თანამედროვე ისრაელის ჩამოყალიბებაში.