შსს-ში ამბობენ, რომ მათი უმთავრესი ამოცანაა საზოგადოებრივი წესრიგისა და მოქალაქეთა უსაფრთხოების დაცვა; სამინისტრო იცავდა თითოეული ადამიანის როგორც შეკრების, ისე გამოხატვის თავისუფლებას, მათი პოლიტიკური შეხედულების, რელიგიური მრწამსის, სექსუალური ორიენტაციისა და სხვა ნიშნის მიუხედავად. მათივე თქმით, თითოეულ ფაქტზე სამინისტრო სათანადოდ რეაგირებდა.

უწყებაში ამბობენ იმასაც, რომ დისკრიმინაციული მოტივით ჩადენილი დანაშაულის წინააღმდეგ ბრძოლა და მათი ეფექტიანი გამოძიება შინაგან საქმეთა სამინისტროს ერთ-ერთი პრიორიტეტია. მათი თქმით, დეტალურად სწავლობენ აქციის მიმდინარეობის დროს მომხდარი თითოეული ინციდენტის ამსახველ შესაბამის ვიდეო-მასალას, და მალევე მისცემენ სამართლებრივ შეფასებას.

გუშინ, 14 ივნისს 7 საათზე დაწყებულ აქციაზე რამდენიმე საათის განმავლობაში ისმოდა სიძულვილის შემცველი, ღირსების შემლახავი და ჰომოფობიური განცხადები. კონტრაქციის მონაწილეები აგინებდნენ აქტივისტებსა და ჟურნალისტებს და ემუქრებოდნენ მათ.

პოლიციამ ადმინისტრაციული წესით 28 პირი დააკავა. კონტრაქცია პარლამენტთან ჰომოფობიურმა ჯგუფებმა მას შემდეგ დაგეგმეს, რაც ცნობილი გახდა, რომ თბილისი პრაიდის ორგანიზატორები იკრიბებობდნენ. ისინი საპატრიარქოს განცხადებას აპროტესტებდნენ პრაიდის შესახებ და მთავრობას პოზიციის დაფიქსირებისკენ მოუწოდებდნენ.