კენდალ ჯენერისა და ჯეიკობ ელორდის სავარაუდო რომანი სერიოზულ სახეს იღებს — წყვილმა ურთიერთობაში ოჯახის წევრებიც ჩართო.

16 მაისს კენდალი და ჯეიკობი ლოს-ანჯელესში კენდალის დასთან, კაილი ჯენერთან და მის შეყვარებულთან, ტიმოთი შალამესთან ერთად შენიშნეს. გავრცელებულ ფოტოებში ჩანს, რომ მანქანაში მდჯარი ჯგუფი პაპარაცებს ემალებოდა. წინა სავარძელზე 28 წლის ელორდი და 30 წლის კენდალი ისხდნენ, უკანა სავარძელზე კი — 28 წლის კაილი და 30 წლის ტიმოთი.

ფოტო: Deuxmoi

"ერთად ძალიან კარგ დროს ატარებენ, მსგავსი ხასიათები და ცხოვრების სტილი აქვთ, ამიტომაც ერთმანეთს კარგად ეწყობიან", — განაცხადა People-ის წყარომ.

იმავე წყაროს ცნობით, ოსკარის ნომინანტები — შალამე და ელორდი — მანამდეც მეგობრობდნენ, სანამ კენდალი და ჯეიკობი დაახლოვდებოდნენ. რაც შეეხება კაილის, ის შალამეს 2023 წლიდან ხვდება და ელორდის მიმართაც დადებითადაა განწყობილი.

ფოტო: Schiaparelli

სოციალურ ქსელებში გავრცელებულ პაემნის ფოტოებს ჯეიკობ ელორდის მიმართ კრიტიკის ტალღა მოჰყვა. მიზეზი ისაა, რომ მსახიობმა სულ ცოტა ხნის წინ უარი თქვა 2026 წლის კანის კინოფესტივალის ჟიურის წევრობაზე და მიზეზად ფეხის ტრავმა დაასახელა.

28 წლის ვარსკვლავი თავდაპირველად დამტკიცებული იყო ჟიურის შემადგენლობაში, თუმცა, ფესტივალის დაწყებამდე რამდენიმე დღით ადრე გავრცელდა ინფორმაცია, რომ ფეხი მოიტეხა.

ჟიურის წევრობა დიდ დატვირთვასთანაა დაკავშირებული — ფილმების ჩვენებები, პრესკონფერენციები და ფესტივალის ცნობილ კიბეებზე ასვლა-ჩამოსვლა — რის გამოც ავსტრალიელმა მსახიობმა ამ პრესტიჟულ შესაძლებლობაზე უარი თქვა.

ფოტო: Getty Images

თუმცა, როცა პაემნიდან გავრცელებულ კადრებში გამოჩნდა, რომ ელორდი თავად მართავდა ავტომობილს, საზოგადოებამ მისი ტრავმის სიმძიმე ეჭვქვეშ დააყენა: "როგორ შეიძლება ფეხის ტრავმის გამო უარი თქვა შესაძლებლობაზე, იყო კანის ფესტივალის ისტორიაში ერთ-ერთი ყველაზე ახალგაზრდა ჟიური, შემდეგ კი საჭესთან დაჯდე, როცა მანქანაში სამი მგზავრი გიზის, რომელთაგან ნებისმიერს შეეძლო შენი ჩანაცვლება?" — წერენ მომხმარებლები პლატფორმა X-ზე.

სოციალური ქსელების ნაწილი ჯეიკობს იცავს და ამბობს, რომ ფესტივალის დატვირთვას მსახიობის ტრავმა შესაძლოა გაერთულებინა.