დღეს, 28 მაისს პროკურატურამ შსს-ს ბოლნისის სამმართველოს ყოფილი დეტექტივ-გამომძიებელი არასრულწლოვის მიმართ ჩადენილი დამამცირებელი და არაადამიანური მოპყრობის ბრალდებით დააკავეს.

გამოძიების ვერსიით, 2019 წლის 13 თებერვალს, ბოლნისის რაიონული სამმართველოს დეტექტივ-გამომძიებელმა ბოლნისის შს რაიონული სამმართველოს ადმინისტრაციულ შენობაში ყოფნის დროს, ქურდობაში მხილებულ არასრულწლოვანს მიაყენა როგორც სიტყვიერი, ისე ფიზიკური შეურაცხყოფა.

პროკურატურის მტკიცებით, ცემის დროს, დარტყმის შედეგად არასრულწლოვანი გადავარდა სკამიდან და მოტყდა მარჯვენა ხელი, რაც სამედიცინო ექსპერტიზის დასკვნის თანახმად, წარმოადგენს ჯანმრთელობის ნაკლებად მძიმე ხარისხის დაზიანებას.

არასრულწლოვანი ბიჭი ჰყვება, რომ პოლიციელები მისგან ბოლნისის ერთ-ერთი მაღაზიის ქურდობის აღიარებას, მოპარული ნივთების ნაწილის ადგილსამყოფელისა და თანამზრახველის დასახელებას ითხოვდნენ. როგორც ის ამბობს, ამის გამო სამართალდამცავები მას სცემდნენ და შეურაცხყოფას აყენებდნენ.

მოზარდის თქმით, პოლიციის განყოფილებაში თავიდან მას, სავარაუდოდ, პოლიციის უფროსი სცემდა, შემდეგ კი ის წავიდა და სხვა პირები სცემდნენ. გარდა ამისა, ბიჭი ამბობს, რომ "ბოთლზე დასმით" ემუქრებოდნენ, წინააღმდეგობის გაწევის დროს კი ხელი მოიტეხა.

ბოლნისის რაიონული სამმართველოს ყოფილი დეტექტივ გამომძიებელი კ.ქ. დაკავებულია საქართველოს სისხლის სამართლის კოდექსის 144³ მუხლის მეორე ნაწილის „ა“, „ბ“ და „ზ“ ქვეპუნქტებით გათვალისწინებული დანაშაულისთვის, რაც ითვალისწინებს ხუთიდან ათ წლამდე ვადით თავისუფლების აღკვეთას.