უკრაინის ახლადარჩეულმა პრეზიდენტმა, ვოლოდიმირ ზელენსკიმ ადმინისტრაციის ხელმძღვანელად დანიშნა ანდრეი ბოგდანი, რომელიც ოლიგარქ იგორ კოლომოისკის იურისტის სტატუსით არის ცნობილი. აქამდე ბოგდანი იურიდიულ საკითხებში ზელენსკის მრჩეველი იყო.

უკრაინული მედიის ინფორმაციით, ანდრეი ბოგდანი პრივატბანკის ნაციონალიზაციის საქმეზე სასამართლოში იგორ კოლომოისკის ინტერესებს იცავდა. წინასაარჩევნო კამპანიის პერიოდში ზელენკის წარმომადგენლები აცხადებდნენ, რომ ბოგდანი კამპანიაში მონაწილეობს, როგორც დიდი ხნის მეგობარი და მის შეხედულებებზე გავლენას არ ახდენს.

კოლომოისკისა და ზელენსკის კავშირების ირგვლივ მრავალი კითხვა არსებობს. სწორედ, ეს იქცა ზელენსკის წინასაარჩევნო კამპანიის ყველაზე სუსტ წერტილად. იგორ კოლომოისკი ერთ-ერთ ყველაზე მდიდარი უკრაინელია. მის მფლობელობაში იყო უკრაინის უმსხვილესი პრივატბანკი, რომლის ნაციონალიზაციაც ყოფილი პრეზიდენტის, პეტრო პოროშენკოს ინიციატივით მოხდა. ზელენსკის განცხადებით მას კოლომოისკისთან მხოლოდ საქმიანი ურთიერთობა აკავშირებს. იმავს ამბობს კოლომოისკიც. ოლიგარქი ასევე, უარყოფს ზელენსკის კამპანიის ფინანსირებასაც.

ვოლოდიმირ ზელენსკი თავის უფლებამოსილებას 20 მაისს შეუდგა. მან უკვე მოაწერა ხელი უმაღლესი რადას დაშლისა და 21 ივლისს ვადამდელი საპარლამენტო არჩევნების დანიშვნის ბრძანებას.

ამავე თემაზე: