დღეს ლევილის მამულის საქართველოსთვის გადმოცემის აქტს მოაწერენ ხელს, რითაც 25 წლიანი ისტორიული პროცესი დასრულდება და მამული ქართველ ხალხს დაუბრუნდება.

დიასპორის საკითხებში სახელმწიფო მინისტრის აპარატის განმარტებით, პარიზიდან 37 კილომეტრში მდებარე 45 ათასი კვადრატული მეტრი ფართობის ისტორიული მამულის საქართველოსათვის გადმოცემის აქტს საქართველოს მთავრობის მხრიდან ხელს დიასპორის საკითხებში საქართველოს სახელმწიფო მინისტრი გელა დუმბაძე მოაწერს, ხოლო ფრანგული მხარიდან აქტზე ხელმომწერნი საქართველოს დემოკრატიული რესპუბლიკის (1918-1921) მთავრობის წევრთა ოჯახების წარმომადგენლები იქნებიან.

როგორც იუსტიციის მინისტრმა, თეა წულუკიანმა განმარტა, საქართველოს და ქართველ ხალხს უბრუნდებათ ის რაც მათ ეკუთვნით:

"1920-იან წლებში სწორედ სახელმწიფოს ხალხის ფულით ნოე რამიშვილის, ნოე ჟორდანიას, ექვთიმე თაყაიშვილის და ჩვენი სხვა წინაპრების მიერ შეძენილ იქნა ეს მამული და შატო, საიდანაც ისინი საქართველოს თავისუფლებისთვის ბრძოლას აგრძელებდნენ".

ხელმოწერის ცერემონიას წულუკიანი, საქართველოს საგანგებო და სრულუფლებიანი ელჩი საფრანგეთში, ეკატერინე სირაძე-დელონე, საქართველოს საგანგებო და სრულუფლებიანი დესპანი საფრანგეთში, გოჩა ჯავახიშვილი, ქ. ლევილის მერიისა და ქართული დიასპორის წარმომადგენლები დაესწრებიან.

ლევილის მამულის საქართველოსათვის გადმოცემის პროცესი 25 წელია მიმდინარეობს. მასში სხვადასხვა დროს უამრავმა ადამიანმა მიიღო მონაწილეობა. მამულის გადმოცემის მიზნით შექმნილმა სპეციალურმა პარიტეტულმა კომისიამ 2014 წლიდან განსაკუთრებით აქტიურად დაიწყო მუშაობა და ეს პროცესი ისტორიული მნიშვნელობის დოკუმენტის ხელმოწერამდე მიიყვანა, რომელიც 23 სექტემბერს საფრანგეთის რესპუბლიკაში, ლევილის მამულში საზეიმოდ გაფორმდება.