ატმოსფერული ჰაერის დაბინძურების შესახებ შექმნილმა თემატურმა ჯგუფმა მუშაობა უკვე დაასრულა და გარემოს დაცვის კომიტეტმაც შემუშავებული რეკომენდაციები გაასაჯაროვა.

თემატური მოკვლევის საფუძველზე, კომიტეტმა შეიმუშავა დროში გაწერილი რეკომენდაციები. ეს რეკომენდაციები სხვადასხვა მიმართულებას მოიცავს მათ შორისაა:

  • ავტოტრანსპორტის გამონაბოლქვი;
  • მშენებლობები და სამშენებლო მტვერი;
  • ბუნებრივი მტვერი;
  • გამწვანების პრობლემა;
  • ტენიანობის და მორწყვის პრობლემა;
  • საწვავის ხარისხი და მონიტორინგი;
  • აზბესტის ხუნდები და აზბესტის შემცველი პროდუქცია;
  • საბურავების როლი ჰაერის დაბინძურებაში;
  • დაბინძურებული ჰაერის ზემოქმედება ადამიანზე;
  • ეკოლოგიურად სუფთა ტრანსპორტის გამოყენების ხელშეწყობა.

ეკოლოგიურად სუფთა ტრანსპორტის ქვეთავში ნათქვამია, რომ ამის წასახალისებლად ბევრი ინიციატივა განხორციელდა და ბევრიც იგეგმება. "აუცილებელია სითამამე და მეტი ინოვაციური თუ ექსპერიმენტული ღონისძიების განხორციელება", — ნათქვამია ანგარიშში.

ამავე დოკუმენტის მიხედვით, თემატური მოკვლევის პერიოდში ჩატარდა შეხვედრები სხვადასხვა დაინტერესებულ მხარესთან და გაჟღერდა ახალი ინიციატივები, რომლებიც მეტ მსჯელობასა და ყურადღებას იმსახურებს:

  • დაინერგოს სატრანსპორტო საშუალებათა ეკოლოგიური კლასიფიკაცია;
  • თბილისის მასშტაბით, მოსაკრებელი დაწესდეს ძრავის მოცულობის მიხედვით;
  • ერთ ოჯახში 3 და მეტი ავტოსატრანსპორტო საშუალების ფლობა დამატებითი მოსაკრებლით განისაზღვროს;
  • შემუშავდეს შეღავათების სპეციალური სახელმწიფო პროგრამა, რომელიც წაახალისებს სტუდენტების მიერ ველოსიპედებისა და სხვა ეკოლოგიურად სუფთა ტრანსპორტის გამოყენებასა და ფეხით სიარულს;
  • თბილისის ძველ უბნებში (მაგალითად, სოლოლაკი), რომელიც გამოირჩევა ინტენსიური დასახლებით, კულტურული მემკვიდრეობის ძეგლებითა და საცობებით, თან, ტურისტულად მიმზიდველია, აიკრძალოს ყველანაირი ავტოსატრანსპორტო საშუალების გადაადგილება. გამონაკლისი შეიძლება იყოს ადგილობრივი მოსახლეობის ჰიბრიდული და ელექტროტრანსპორტი;
  • თბილისის მერიამ განიხილოს იმის შესაძლებლობა, რომ შოთა რუსთაველის გამზირი კვირაში ერთხელ (მაგალითად, კვირა დღეს) დაიკეტოს ავტოსატრანსპორტო საშუალებებისთვის და გაიხსნას მხოლოდ ქვეითთათვის;
  • ზეპირ მოსმენებზე თბილისი მერის მოადგილემ, მაია ბითაძემ, აღნიშნა ძალიან საინტერესო ინიციატივა ­ქალაქის გარეუბნებიდან ცენტრის მიმართულებით მოსახლეობის გადაადგილება საბაგიროს მეშვეობით.

გარემოს დაცვის კომიტეტის თავმჯდომარემ, კახა კუჭავამ მოგვიანებით განმარტა, რომ გამოქვეყნებულ ანგარიშში რეკომენდაციებთან ერთად ის იდეებიცაა წარმოდგენილი, რომელიც მოკვლევის დროს იქნა მიღებული და კომიტეტმა შემდგომი განხილვისთვის საინტერესოდ მიიჩნია.