მედიაში ინფორმაციის გავრცელების შემდეგ, აჭარის ტელევიზია გამოეხმაურა მრჩეველთა საბჭოს წევრების მოთხოვნას ტელევიზიის დირექტორის, ნათია კაპანაძის იმპიჩმენტის შესახებ. მათი განცხადებით, მიმდინარე პროცესები უპირისპირდება სარედაქციო დამოუკიდებლობას და მთლიანად საზოგადოებრივი მაუწყებლის იდეას.

"საზოგადოებრივი მაუწყებლის აჭარის ტელევიზიამ და რადიომ ბოლო წლების განმავლობაში დაადასტურა, რომ იგი აუდიტორიას აწვდის ობიექტურ და მიუკერძოებელ ინფორმაციას. ორგანიზაციამ შეძლო შეექმნა პოლიტიკური და კომერციული გავლენისაგან თავისუფალი მაუწყებლობა", — წერია ტელევიზიის გავრცელებულ განცხადებაში.

მათი თქმით, საბჭომ უნდა გამოიჩინოს სიფრთხილერადგან საქმე სიტყვის თავისუფლებას და საზოგადოებრივი მაუწყებლის აჭარის ტელევიზიისა და რადიოს დამოუკიდებლობას ეხება.

კაპანაძის იმპიჩმენტის მოთხოვნა

ნათია კაპანაძის იმპიჩმენტი მრჩეველთა საბჭოს ორმა წევრმა მოითხოვა. მათ შორისაა ირაკლი დარცმელიძე, რომელიც ნაციონალური მოძრაობის კვოტით არის წარდგენილი და გიგა ჩხარტიშვილი, რომელიც ქართული ოცნების კვოტითაა საბჭოში. იმპიჩმენტის მოთხოვნის წარდგენას ხმათა 1/3-ის ანუ საბჭოს ორი წევრის განცხადება სჭირდება. იმპიჩმენტის გამოსაცხადებლად კი ხმათა უმრავლესობა, ანუ 3 ხმა არის საჭირო.

საბჭოს თავმჯდომარემ ნატა იმედაიშვილმა On.ge-ს უთხრა, რომ უნდობლობის გამოცხადების შესახებ განცხადება 10 აპრილს მიიღო და კაპანაძეს 11 აპრილს აცნობა. იმედაიშვილი განმარტავს, რომ მისი უფლებამოსილებაა 10 დღის განმავლობაში ჩანიშნოს სხდომა, რომელზეც იმპიჩმენტის საკითხს განიხილავენ. მისი თქმით, 12 აპრილს საბჭო შეიკრიბება და იმ პრეტენზიებს განიხილავს, რომელიც დარმცელიძისა და ჩხარტიშვილის განცხადებაშია ასახული.

თავმჯდომარე განმარტავს, რომ საბჭოს წევრებს პრეტენზიები აქვთ პრიორიტეტების შეუსრულებლობაზე, ხელფასების პრობლემასა და თანამშრომლის სამსახურიდან გათავისუფლებაზე. მისი თქმით, დოკუმენტს არ გაცნობია და პოზიციას ვერ დააფიქსირებს, თუმცა კაპანაძის დირექტორობის პერიოდში არსებული პრობლემების განხილვისას თავადაც იგივე საკითხებს ასახელებს.

კაპანაძის დირექტორობა

ნათია კაპანაძე აჭარის ტელევიზიის დირექტორად 2016 წლის 24 ოქტომბერს სამწლიანი ვადით აირჩიეს. უფლებამოსილების შესრულებას ის ამავე წლის 21 დეკემბრიდან შეუდგა.

მისი დირექტორობის პერიოდში ეთერში რამდენიმე სხვადასხვა გადაცემა გავიდა. მათ შორის, რადიო თავისუფლების პროექტები, რომელთა გაშვებაზეც საზოგადოებრივი მაუწყებლის პირველმა არხმა უარი განაცხადა.

წელს ეუთოს დემოკრატიული ინსტიტუტებისა და ადამიანის უფლებების ოფისმა (OSCE/ODIHR) ანგარიშში განაცხადა, რომ აჭარის ტელევიზია იყო "ერთადერთი ტელესადგური, რომელმაც შესთავაზა მაყურებელს არჩევნებში მონაწილეთა ზოგადი შედარება".