ქართული ოცნებიდან წასული დეპუტატის ეკა ბესელიასა და სხვების კანონპროექტს მოსამართლეთა არჩევის წესისა და პროცედურების შესახებ იურიდიულ საკითხთა კომიტეტზე პირველი მოსმენით განიხილავენ.

სხდომის დაწყებამდე ფრაქცია ქართული ოცნების თავმჯდომარემ, მამუკა მდინარაძემ განაცხადა, რომ კომიტეტი კანონპროექტს ფორმალურად განიხილავს და ამ კანონპროექტის წარდგენა ბესელიას და ოცნებიდან წასული სხვა დეპუტატებისთვის პოლიტიკური ნაბიჯია.

ანალოგიური განცხადება გააკეთა კომიტეტის წამყვანმა, დავით მათიკაშვილმა განხილვის დაწყებამდე.

"კარგი იქნებოდა თუ ეს კანონპროექტი სხვა კანონპროექტებთან კონკურენციის ჭრილში იქნებოდა მოსმენილი, თუმცა რადგან ამ ეტაპზე პარლამენტს აქვს შესაბამისი გადაწყვეტილება მიღებული, ამას ფორმალური მხარე ეძლევა, თუმცა ცხადია ჩვენ მოვისმენთ კანონპროექტს", — განაცხადა მათიკაშვილმა.

ეკა ბესელიას თქმით, დავით მათიკაშვილის განცხადება უპასუხისმგებლობაა.

"ფორმალური განხილვა რას ნიშნავს, არ ვიცი. ეს არის მნიშვნელოვანი კანონპროექტი და თუნდაც ფორმალურად განიხილავ ხმამაღლა მაინც არ უნდა თქვა", — განაცხადა ბესელიამ.

მან ასევე თქვა, რომ ასეთი განმარტებების გაკეთებისას მეტი სიფრთხილეა საჭირო.

"ეს პარლამენტია და განსაკუთრებით ამ კომიტეტს სჭირდება ისეთი მიდგომების დაცვა, რომელიც უნდა იყოს კარგი მაგალითის და პრეცედენტის შემქმნელი", — განაცხადა ბესელიამ.

ეკა ბესელიას კანონპროექტით, კანდიდატთა წარსადგენად საჭირო იქნება იუსტიციის უმაღლესი საბჭოს როგორც მოსამართლე, ისე არამოსამართლე წევრების მხარდაჭერა.

გარდა ამისა, შეიქმნება სპეციალური სამუშაო ჯგუფი, რომელშიც წარმოდგენილნი იქნებიან სახალხო დამცველის, ადვოკატთა ასოციაციის, არასამთავრობო ორგანიზაციების და სამეცნიერო წრეების წარმომადგენლები. კანდიდატთა შერჩევის მეორე ეტაპზე სწორედ აღნიშნული ჯგუფი იმუშავებს, რის შემდეგაც პროცესი პარლამენტის იურიდიულ საკითხთა კომიტეტში გადაინაცვლებს.

ბესელიასთან ერთად პროექტის ინიციატორები არიან დეპუტატები: - ლევან გოგიჩაიშვილი, ზვიად კვაჭანტირაძე, გედევან ფოფხაძე, ბექა ნაცვლიშვილი, ირმა ინაშვილი, გიორგი ლომია, გელა მიქაძე, ემზარ კვიციანი, ადა მარშანია, ნატო ჩხეიძე, გია ჟორჟოლიანი და მირიან წიკლაური.

ამავე თემაზე: