უზენაესი საბჭოს სამი დეპუტატი, რომლებმაც საქართველოს დამოუკიდებლობის აღდგენის აქტს ხელი მოაწერეს, ავლაბრის რეზიდენციაში დაგეგმილ მიღებას არ დაესწრებიან. პროტესტის მიზეზი, საქართველოს პრეზიდენტის სალომე ზურაბიშვილის განცხადებებია.

უზენაესი საბჭოს დეპუტატებმა რუსთავი 2-ს უთხრეს, რომ, თავის დროზე, სალომე ზურაბიშვილი ამართლებდა ლეგიტიმურად არჩეული ხელისუფლების დამხობას და ჯერ კიდევ 90-იანი წლების დასაწყისში კრემლის რიტორიკას იმეორებდა.

უზენაესი საბჭოს ყოფილი დეპუტატები სიმბოლურად მივიდნენ ზვიად გამსახურდიასა და მერაბ კოსტავას საფლავზე და კიდევ ერთხელ დააფიქსირეს, პროტესტი, თუ რატომ არ მიდიან მიღებაზე.

ნემო ბურჭულაძის თქმით, მსოფლიო გვეუბნება რომ 2008 წლის ომში მართლები ვართ და საქართველოს პრეზიდენტი თავის ქვეყანას აზარალებს.

"მე არ ვიცი რომ მივიდე, რატომ მივიდე, მომილოცავს დამოუკიდებლობის დღეს თუ მომისამძიმრებს", — აცხადებს დეპუტატი.

უზენაესი საბჭოს ყოფილი წევრი, ბიმურზა დადეშქელიანი-აფრასიძე კი ქართული ოცნების ხელისუფლების ზვიად გამსახურდიას გზისკენ „შემობრუნებას“ მოახლოებულ შუალედურ არჩევნებს უკავშირებს.

"მიუღებელია თავისი პოლიტიკური მოღვაწეობით დღესაც და 1990-1991 წლებშიც. ფაქტობრივად, ქართულ სახელმწიფოს ებრძვის და ებრძოდა კიდეც, როცა ქართული სახელმწიფო იბადებოდა", — განაცხადა ყოფილმა დეპუტატმა.

უზენაესი საბჭოს ყოფილი წევრი, ზურაბ ძოწენაძე ამბობს, რომ სალომე ზურაბიშვილს ქვეყნის წინააღმდეგ გაკეთებული განცხადებების გამო ბოდიში არ მოუხდია.

"მე ვთვლი, რომ არ იქნება სწორი მისვლა, თუმცა პრეზიდენტის ინსტიტუტს პატივს ვცემ და ასეთ მიღებაზე უნდა წავსულიყავით. ეს მომგებიანი თემაა და ყველა ხელისუფლებას დასჭირდება, რომ მომავალში ამ თემით მოსახლეობის განწყობა მიიმხრონ და ქულები აიღონ", — განაცხადა მან.

9 აპრილთან დაკავშირებით საქართველოს პრეზიდენტი სალომე ზურაბიშვილი ავლაბრის რეზიდენციაში, რომელი ახლა უკვე სახელმწიფო ცერემონიების სასახლეა, მიღებას მართავს. მან მიღებაზე საქართველოს დამოუკიდებლობის აღდგენის აქტის ხელმომწერები მიიწვია. ღონისძიება 17:00 საათზეა დაგეგმილი.