ნაციონალურმა მოძრაობამ ქართული ოცნების აქტივისტები თავდასხმასა და ფიზიკურ ანგარიშსწორებაში დაადანაშაულა, რის შემდეგაც ქართულმა ოცნებამ მხარდამჭერებს მოუწოდა, მაქსიმალურად მოერიდონ კონფლიქტურ სიტუაციებში ჩაბმას.

ნაციონალური მოძრაობის ინფორმაციით, ქართული ოცნების დანით შეიარაღებული აქტივისტები სოფელ გამარჯვების ერთიანი ნაციონალური მოძრაობის შტაბში შეიჭრნენ და ფიზიკურად გაუსწორდნენ შტაბის წევრ ნიკა მჭედლიძეს:

"საგულისხმოა, რომ თავდამსხმელები ლაშა ხაჭვანი და გივი ჩილაშვილი ქართული ოცნების ის აქტივისტები არიან, რომლებიც ორი დღის წინ ხევდნენ ერთიანი ნაციონალური მოძრაობის პლაკატებს.


ამ შემთხვევის პარალელურად თავდამსხმელთაგან ერთ-ერთის, გივი ჩილაშვილის მამა, ქუჩაში დაზარალებულ ნიკა მჭედლიძის დას თავს დაესხა, ის ნაცემია და ფიზიკური დაზიანებები აღენიშნება".

ნაცმოძრაობამ მოუწოდა ქართულ ოცნებას, აღკვეთოს მისი მხარდამჭერების მსგავსი ქმედებები, ხოლო სამართალდამცველებისგან იმ პირების დაკავება მოითხოვა, ვინც, მათი თქმით, თავდასხმაში მონაწილეობდნენ.

აღნიშნულიდან მალევე, ფაქტს გამოეხმაურა ქართული ოცნება:

"დღეს დაფიქსირდა ფიზიკური დაპირისპირების ორი ფაქტი ზუგდიდსა და თეთრიწყაროში. ორივე შემთხვევაში ინციდენტი მოხდა ქართული ოცნების და ერთიანი ნაციონალური მოძრაობის აქტივისტებსა და მხარდამჭერებს შორის. როგორც არაერთხელ აღვნიშნეთ, ჩვენთვის მიუღებელია საარჩევნო პროცესში ნებისმიერი სახის დაპირისპირება და მითუმეტეს ძალადობა".

ქართული ოცნების განცხადებით, ორივე ფაქტზე დაწყებულია გამოძიება და მათ იმედი აქვთ, რომ ის ეფექტიანი იქნება, დამნაშავეები კი შესაბამისად დაისჯებიან.

გარდა ამისა, მმართველმა პარტიამ მხარდამჭერებსაც მიმართა: "კვლავ გვინდა მოვუწოდოთ ყველა მხარეს და განსაკუთრებით ქართული ოცნების მხარდამჭერებს, არავითარ შემთხვევაში არ ჩაებან კონფლიქტში და თავიდან აიცილონ ნებისმიერი სახის ფიზიკური ან სიტყვიერი დაპირისპირება".