ქართული ოცნების თავმჯდომარის, მამუკა მდინარაძის ინფორმაციით, ეკა ბესელიასთვის შეცდომით გაგზავნილ წერილში ერთ-ერთი პუნქტი 2016 წელს ეხებოდა. მდინარაძის თქმით, ამ წელს ბიძინა ივანიშვილი პარტიის მაშინდელ ხელმძღვანელს, გიორგი კვირიკაშვილს ურჩევდა, ბესელია სიაში საერთოდ არ მოხვედრილიყო.

"იქ [გაგზავნილ მესიჯში] არაფერი ისეთი არ წერია, რაც არის ტყუილი. აბსოლუტური სიმართლეა თითოეული პუნქტი და თითოეულ პუნქტს ვეთანხმები.. დიდი სიამოვნებით, მე ვრთავ ნებას [ეკა ბესელიას] გამოქვეყნოს, გაასაჯაროვოს ეს მესიჯი", — თქვა მდინარაძემ.

გუშინ, 26 მარტს ქართული ოცნებიდან წასულმა დეპუტატმა, ეკა ბესელია თქვა, რომ მამუკა მდინარაძემ შეტყობინება შეცდომით მიწერა. მამუკა მდინარაძემ დაადასტურა, რომ მესიჯი ბესელიას შეცდომით ნამდვილად მიწერა, თუმცა აცხადებს, რომ გზავნილი "პარტიული" არ ყოფილა:

"ნინო წილოსანმა მკითხა, რა პოზიციები იყო, დღეს რა მესიჯები გახმოვანდა და ჩამოყრილი მქონდა და ახლავე ჩაგიგდებ მეთქი ვუთხარი, წინ ვეჯექი, მის ოთახში და შეცდომით, ეტყობა ბესელიაზე ბევრს ვფიქრობ და გადავუგზავნე. შემდეგ თითქოს მე ბოდიშები მიხდია, მსგავსი არ ყოფილა. ჩვენ გავაგრძელეთ მიმოწერა, მე და ეკამ. ის მესიჯი წავშალე, არ იყო ეკასთვის განკუთვნილი".