საქართველოს წიგნის გამომცემელთა და გამავრცელებელთა ასოციაცია და მწერალთა სახლი საქართველოს საავტორო უფლებათა ასოციაციას მხარდაჭერას უცხადებენ.

ოფიციალურ განცხადებებში, საქართველოში საავტორო და მომიჯნავე უფლებებისა და ზოგადად, ხელოვნების სფეროში არსებულ რუსულ საფრთხეებზეა საუბარი. ისინი კამპანიას - #არაინტელექტისოკუპაციას უერთდებიან და მოქალაქეებს კამპანიაში ჩართვისკენ მოუწოდებენ.

“არ დავუშვათ ქართული სახელოვნებო სივრცის რუსეთის ხელში აღმოჩენა!“, - ნათქვამია საქართველოს წიგნის გამომცემელთა და გამავრცელებელთა ასოციაციის განცხადებაში.

“გვსურს ასოციაციას სრული მხარდაჭერა გამოვუცხადოთ და ლიტერატურის მოღვაწეებს და არა მარტო მათ, მოვუწოდოთ კამპანიაში ჩაერთონ. მხოლოდ საზოგადოების სიმტკიცით და ერთიანობით შევძლებთ რუსული აგრესიის შეკავებას. ერთად ვუთხრათ არა, ინტელექტის ოკუპაციას!”, - ვკითხულობთ მწერალთა სახლის ოფიციალურ განცხადებაში.

საინფორმაციო კამპანია - არა ინტელექტის ოკუპაციას, საქართველოს საავტორო უფლებათა ასოციაციამ რუსული აგრესიის შეჩერების მიზნით წამოიწყო.

რუსული მხარე საქართველოში, საავტორო უფლებებში გავლენის მოპოვებას 2017 წლიდან ცდილობს, როდესაც რუსეთის ავტორთა საზოგადოებამ (RAO) ევრაზიის უფლების მფლობელთა საზოგადოებების კონფედერაცია (EACOP) და ინტელექტუალური საკუთრების ობიექტებთან დაკავშირებული ტრანზაქციების საკოორდინაციო ცენტრი IP CHAIN დააფუძნა, რომლის მეშვეობითაც რუსეთი ღიად აკონტროლებს კონფედერაციის წევრ ქვეყნებში (აზერბაიჯანი, სომხეთი, ყაზახეთი, ყირგიზეთი და ბელორუსია) შეგროვებულ ჰონორარსა და ამ ჰონორარის მფლობელთა შესახებ ინფორმაციას.

საქართველო საავტორო უფლებების კუთხით, რეგიონში უპირობო ლიდერია, რაც ოკუპანტ ქვეყანას გარკვეული მიზეზების გამო არ აწყობს. საავტორო უფლებათა ასოციაციის წარმატებული მუშაობიდან გამომდინარე რუსეთმა მასზე კონტროლის აღების მიზნით, ასოციაციის ევრაზიულ კავშირში გაერთიანება მოითხოვა, თუმცა მათი მოთხოვნა GCA–იმ არ დააკმაყოფილა.

რუსეთის მიერ დაფუძნებულ ევრაზიის კავშირში გაწევრიანებაზე უარის მიღების შემდეგ, რუსეთმა ასოციაციის დასუსტება და ქართულ ხელოვნებაზე გავლენის მოპოვება გადაწყვიტა. რუსეთის ავტორთა საზოგადოების მხარდაჭერთ შექმნილი ორგანიზაციის და ამ ორგანიზაციის დამფუძნებელი მომღერლების, დავით ხუჯაძისა და აჩი ფურცელაძის მეშვეობით, ოკუპანტი ქვეყანა საქართველოს საავტორო უფლებათა ასოციაციის დისკრედიტაციას ცდილობს.

რუსული მხარდაჭერის მქონე, ახლად დაფუძნებული ორგანიზაცია, ქართველ მუსიკოსებს ასოციაციაში გაწევრიანების მიზნით ხშირად მიმართავს. თუმცა ქართველი მუსიკოსები ამ ფაქტს არასერიოზულს უწოდებენ და კოლეგებს დაფიქრებისკენ მოუწოდებენ.

საავტორო უფლებების სფეროში რუსული ინტერესების გატარება უკვე არსებული სისტემისთვის გამოუსწორებელი დარტყმის მიყენებას და ქვეყნის იმიჯის შელახვას ნიშნავს. განსაკუთრებით მაშინ, როცა საქართველო ასრულებს ევროპის ასოცირების ხელშეკრულებით გათვალისწინებულ ვალდებულებებს. სწორედ ევროკავშირთან ასოცირების ხელშეკრულების მიხედვით, ინტელექტუალური საკუთრების დაცვა სახელმწიფოს ერთ-ერთ მნიშვნელოვან პრიორიტეტს წარმოადგენს.