ქერჩის სრუტეში მომხდარი ინციდენტის გამო, რა დროსაც უკრაინის სამი გემი და ეკიპაჟის წევრები დააკავეს, აშშ-მ, კანადამ და ევროკავშირმა რუსეთის წინააღმდეგ ახალი სანქციები შეიმუშავეს. სამივე მათგანმა ახალი სანქციები 15 მარტს გააჟღერა. აღნიშნულ სანქციებს რუსეთი უკვე გამოეხმაურა და აღნიშნა, რომ მათ უპასუხოდ არ დატოვებს.

აშშ-ს ფინანსთა სამინისტრომ სასანქციო სიაში ექვსი ფიზიკური პირი და რვა რუსული კომპანია დაამატა. სანქციების ქვეშ მოყოლილი ხუთი პირი ანექსირებული ყირიმის სასაზღვრო სამსახურის მაღალჩინოსანია, ხოლო ერთი — არაღიარებული დონეცკის რესპუბლიკის ცესკოს თანამშრომელი. ფინანსთა სამინისტროს თქმით, სასანქციო სიის ახალ ფიგურანტებს ქერჩის ინციდენტთან, ყირიმის ანექსიასთან და დონბასის არჩევნებთან აქვთ კავშირი.

ევროკავშირმა სანქციები გაატარა რუსეთის რვა მოქალაქის წინააღმდეგ. გარდა იმისა, რომ სიაში მოხვდნენ მესაზღვრეები და სამხედროები. სანქციები შეეხო დონის, იზუმრუდისა და სუზდალეცის გემების სამ ხელმძღვანელს.

კანადის სანქციების სიაში მოხვდა 25 ადამიანი, მათ შორის VTB ბანკის ხელმძღვანელი, როსნეფტის ხელმძღვანელი, რუსეთის გვარდიის დირექტორი, როსკომნადზორის ხელმძღვანელი, რუსეთის რკინიგზის ყოფილი დირექტორი და ბიზნესმენ არკადი როტენბერგის შვილი. ამასთანავე, სანქციები შეეხო 10 რუსულ კომპანიას.

ქერჩის კრიზისი

2018 წლის 25 ნოემბერს რუსულმა მხარემ სამ უკრაინულ გემს ქერჩის სრუტეში ცეცხლი გაუხსნა და შემდეგ დააკავა. რუსეთმა უკრაინის 20-ზე მეტი სამხედრო დააკავა.

კრიზისი მაშინ დაიწყო, როცა რუსულმა მხარემ უკრაინული გემები თავისი საზღვაო ტერიტორიის დარღვევაში დაადანაშაულა. 25 ნოემბერს, დილით, უკრაინული გემები "ბერდიანსკი" და "ნიკოპოლი", ბუქსირ "იანა კაპასთან" ერთად შავი ზღვის ტერიტორიიდან აზოვის ზღვაში მიცურავდნენ ქერჩის სრუტის გავლით. ეს არის ერთადერთი გზა ამ მიმართულებით წასასვლელად, რომლის აკვატორიასაც რუსეთი და უკრაინა იზიარებენ.

უკრაინული მხარე ამბობს, რომ რუსეთმა პროვოკაცია მოაწყო. მათი მტკიცებით, რუსული გემი უკრაინელების ბუქსირს განგებ შეეჯახა, რის შედეგადაც ბუქსირის რამდენიმე ნაწილი მნიშვნელოვნად დაზიანდა. შეჯახების შემდეგ უკრაინულმა გემებმა მარიოპოლისის მიმართულებით ცურვა განაგრძეს, თუმცა რუსულმა მხარემ ქერჩის სრუტეზე გამავალი ხიდის ქვეშ ტანკერი ჩააყენეს და უკრაინულ გემებს გზის გაგრძელების საშუალება არ მისცეს. მოგვიანებით, ადგილზე რუსული ვერტმფრენებიც გამოჩნდნენ, რათა ტერიტორია გაეკონტროლებინათ.

რუსული მხარის განცხადებით, ამ მოქმედებებს უსაფრთხოების ზომების მისაღებად ახორციელებდნენ. ამ ფაქტს უკრაინული მხარე უარყოფს. მათი მტკიცებით, გემების გადაადგილების მარშრუტი წინასწარ იყო შეთანხმებული რუსულ მხარესთან.

26 ნოემბერს უკრაინის უმაღლესმა რადამ დაამტკიცა პრეზიდენტის, პეტრო პოროშენკოს განკარგულება საომარი მდგომარეობის გამოცხადების შესახებ. მდგომარეობა რუსეთის საზღვართან მდებარე 10 რეგიონში გამოცხადდა და 30 დღე გაგრძელდება.

ამ პერიოდში 16-დან 60-წლამდე რუსეთის მოქალაქე კაცებს უკრაინამ ქვეყანაში შესვლა აუკრძალა. გამონაკლისი იყო ჰუმანიტარული ხასიათის მგზავრობები, მათ შორის, დაკრძალვაზე დასწრება.

ქერჩში განვითარებულ მოვლენებს მაშინვე მოყვა რეაქცია საერთაშორისო საზოგადეობის მხრიდან. მათ დაგმეს რუსეთის ქმედებები და უკრაინის სუვერენიტეტისა და ტერიტორიული მთლიანობის დარღვევაში დაადანაშაულა.

ამავე თემაზზე: