დიდი ბრიტანეთის პარლამენტმა ბრექსიტის თარიღის გადადებაზე საკითხს მხარი დაუჭირა, 412 ხმით 202-ის წინააღმდეგ. ეს იმას ნიშნავს, რომ დიდი ბრიტანეთი, შესაძლოა, 29 მარტს აღარ გავიდეს ევროკავშირიდან. პრემიერმა ტერეზა მეიმ თქვა, რომ ბრექსიტი, შეიძლება მაქსიმუმ სამი თვით გადაიდოს და შეთანხმება 29 მარტის ნაცვლად, 30 ივნისს შედგეს. მანამდე პარლამენტმა მხარი არ დაუჭირა შეთანხმების გარეშე ევროკავშირიდან გასვლას.

დღევანდელ კენჭისყრას გამოეხმაურა ევროკომისია, რომლის განცხადებაში ნათქვამია, რომ ისინი გაითვალისწინებენ კენჭისყრის შედეგს 50-ე მუხლის ამოქმედების გადადებაზე, თუმცა ეს მოითხოვს ევროკავშირის წევრი ქვეყნების ერთსულოვან თანხმობას.

"ევროკავშირის საბჭომ უნდა განიხილოს ეს საკითხი, გაითვალისწინოს მისი საჭიროება".

ტერეზა მეის შეთანხმება უკმაყოფილებას იწვევს როგორც ევროსკეპტიკოსებში, ისე ბრექსიტის მხარდამჭერებში. გეგმის მოწინააღმდეგეები ამბობენ, რომ მსგავსი გეგმით დიდი ბრიტანეთი დაზარალდება და ევროკავშირის გავლენა ქვეყანაში შენარჩუნდება.

მას შემდეგ, რაც ტერეზა მეის გეგმის პირველადი ვარიანტი 15 იანვარს ჩავარდა, ის ევროპაში დამატებითი გარანტიებისთვის გაემგზავრა. 12 მარტის კენჭისყრამდე რამდენიმე დღით ადრე მეიმ განაცხადა, რომ ევროკავშირთან შეთანხმებას მიაღწია და ე.წ. ბექსტოპთან დაკავშირებით გარანტიები მიიღო. კერძოდ, ე.წ. ბექსტოპი დროებითი იქნებოდა. მაშინ ევროკომისიის პრეზიდენტმა, ჟან-კლოდ იუნკერმა განაცხადა, რომ ეს "ბოლო შანსია და მესამე აღარ იქნება".

დიდმა ბრიტანეთმა ევროკავშირი ფორმალურად 2019 წლის 29 მარტს უნდა დატოვოს, რის შემდეგაც სამწლიანი გარდამავალი პერიოდი დაიწყება.