ენმ-ს ხელისუფლების საქმიანობის შემსწავლელი დროებითი საგამოძიებო კომისიის მდივანმა, სოზარ სუბარმა ჟურნალისტებთან სხდომის დაწყებამდე განაცხადა, რომ თუ საგამოძიებო კომისიაზე მამუკა ხაზარაძე და ბადრი ჯაფარიძე არ გამოცხადდებიან, ეს დანაშაული იქნება და ამაზე 1 წლამდე პატიმრობაა.

"თუ მოვლენ ძალიან კარგი იქნება, რადგან საზოგადოებას შესაძლებლობა ექნება მოისმინონ პასუხები მათ როლზე ამ კრიმინალურ ისტორიაში, თუ არ მოვლენ ამაზე საქართველოს კანონმდებლობას თავისი წესი აქვს, ეს არის დანაშაული, რომელიც 1 წლამდე პატიმრობას ითვალისწინებს", — განაცხადა სოზარ სუბარმა.

ენმ-ს ხელისუფლების საქმიანობის შემსწავლელმა დროებითმა საგამოძიებო კომისიამ კოალიცია ძლიერი საქართველოს ლიდერები მამუკა ხაზარაძე და ბადრი ჯაფარიძე გამოკითხვაზე დაიბარა. გავრცელებული განცხადების მიხედვით, საქმე შპს მაგნატის საქმის განხილვას ეხება.

"სხდომაზე მოწვეულნი არიან ბატონი ჯემალ ლეონიძე (შპს "მაგნატის" მესაკუთრე), მისი ადვოკატი ბატონი როინ მიგრიაული, ბატონები ბადრი ჯაფარიძე და მამუკა ხაზარაძე" — წერია კომისიის განცხადებაში.

შეგახსენებთ, 21 მარტის წინა ხელისუფლების საქმიანობის შემსწავლელი კომისიის სხდომის დაწყებისას, კომისიის თავმჯდომარემ, თეა წულუკიანმა განაცხადა, რომ პარლამენტის საგამოძიებო კომისიის სხდომაზე გამოუცხადებლობა სისხლის სამართლის პასუხისმგებლობას იწვევს.

"ჩვენ ხუმრობას არ ვაპირებთ!" — წულუკიანი წინა ხელისუფლებას ემუქრება

"ჩვენ ხუმრობას არ ვაპირებთ! — ყველა პირი, ვინც წინა ხელისუფლებას წარმოადგენდა, კეთილს ინებებს და კომისიის წინაშე მობრძანდება და შემდეგ არ იტყვის, რომ არ იცოდა, რომ გამოუცხადებლობის შემთხვევაში საკმაოდ მკაცრი სასჯელი არსებობდა!," — თქვა წულუკიანმა.

თბილისის მერმა კახა კალაძემ წინა ხელისუფლების საქმიანობის შემსწავლელი კომისიის მიერ, კოალიცია ძლიერი საქართველოს ლიდერების მამუკა ხაზარაძისა და ბადრი ჯაფარიძის დაბარებასთან დაკავშირებით განაცხადა, რომ "ხაზარაძე-ჯაფარიძეს პოლიტიკაში არ ყოფილან, პოლიტიკურ პარტიებს არ წარმოადგენდნენ, მაგრამ მათ თავიანთი როლი ჰქონდათ სააკაშვილის ხელისუფლების პირობებში."

"კარგად გვახსოვს ყველას, თუ რა ხდებოდა - ღამის საათებში როგორ ხდებოდა დაკავებები, შემდეგ ციხეებზე ნოტარიუსების შეყვანა, ბიზნესების გადაფორმება. მაშინ ხაზარაძე-ჯაფარიძეს რაც შეეხება, ისინი პოლიტიკაში არ ყოფილან, პოლიტიკურ პარტიებს არ წარმოადგენდნენ, მაგრამ მათ თავიანთი როლი ჰქონდათ სააკაშვილის ხელისუფლების პირობებში. ამიტომ ყველა კითხვას შესაბამისი პასუხი უნდა გაეცეს და საზოგადოებას ყველაფერზე სრული ინფორმაცია ჰქონდეს," — განაცხადა კალაძემ.

ენმ-ს ხელისუფლების საქმიანობის შემსწავლელმა კომისიამ ბადრი ჯაფარიძე და მამუკა ხაზარაძე დაიბარა

ცნობისთვის, ბიზნესმენი ჯემალ ლეონიძე ავტოგასამართი სადგურების ქსელის, მაგნატის მესაკუთრე იყო. მედიაში გავრცელებული ინფორმაციით, ნაციონალური მოძრაობის ხელისუფლების დროს, ბიზნესმენს ქონება ჩამოართვეს და დააპატიმრეს. ლეონიძე ციხიდან პოლიტპატიმრის სტატუსით გამოვიდა და წართმეული ქონების დაბრუნებას ითხოვდა. ლეონიძე წინა ხელისუფლების მაღალჩინოსნებთან ერთად, ქონების წართმევაში მამუკა ხაზარაძეს ადანაშაულებდა.