დიდი ბრიტანეთის პარლამენტმა პრემიერ-მინისტრ ტერეზა მეის ბრექსიტის გეგმას, რომელიც ევროკავშირთან იყო შეთანხმებული, მხარი არ დაუჭირა. გეგმის წინააღმდეგ 432-მა დეპუტატმა მისცა ხმა, მხარი კი 202-მა დაუჭირა.

უახლოეს საათებში ტერეზა მეიმ პარლამენტის კენჭისყრა უნდა შეაფასოს და ევროკავშირისა და დიდი ბრიტანეთის სამომავლო ურთიერთობაზე ისაუბროს.

ოპოზიციონერმა და ლეიბორისტული პარტიის ლიდერმა, ჯერემი კორბინმა მეის დამარცხებას კატასტროფული უწოდა. გარდა ამისა, ის მთავრობისთვის უნდობლობის ვოტუმის განხილვას ითხოვს. მანვე აღნიშნა, რომ 1924 წლის შემდეგ მთავრობა პარლამენტში ამხელა სხვაობით პირველად დამარცხდა.

ე.წ. მკაცრი ბრექსიტის მომხრეები ტერეზა მეის გეგმას აკრიტიკებენ, რადგან მიაჩნიათ, რომ ქვეყანაში ევროკავშირი დიდ გავლენას შეინარჩუნებს. შეთანხმების წინააღმდეგ გამოდიან ისინიც, ვინც ახალი რეფერენდუმის ჩატარებას ითხოვს.

დიდმა ბრიტანეთმა ევროკავშირი ფორმალურად 2019 წლის 29 მარტს უნდა დატოვოს, რის შემდეგაც სამწლიანი გარდამავალი პერიოდი დაიწყება. პარლამენტის კენჭისყრის შემდეგ უცნობია როგორ განვითარდება ბრექსიტისა და დიდი ბრიტანეთის ბედი.

ევროკავშირმა ერთობლივ განცხადებაში მოუწოდა დიდი ბრიტანეთის მთავრობას, რომ რაც შეიძლება მალე გააჟღეროს სამოქმედო გეგმა. მათივე თქმით, ისინი მზად არიან ნებისმიერი სცენარისთვის, მათ შორის ბრექსიტზე შეთანხმების გარეშე.

ამავე თემაზე: