შინაგან საქმეთა სამინისტრო აცხადებს, რომ გლდანში 8 მარტს საქართველოს ბანკზე მომხდარი ყაჩაღური თავდსხმის ბრალდებით დაკავებულია ორი პირი, ერთი კი იძებნება. მათივე ცნობით, ორივე დაკავებული წარსულში ნასამართლევია. ამის შესახებ უწყებაში დღეს, 12 მარტს ბრიფინგი გაიმართა.

გამოძიების ვერსიით, შეიარაღებული და ნიღბიანი ბრალდებულები გლდანში საქართველოს ბანკში შეიჭრნენ და სიცოცხლის მოსპობის მუქარით ფული მოითხოვეს. ბანკის ფილიალთან მისულ დაცვის პოლიციას თავდამსხმელებმა ცეცხლი გაუხსნეს. შსს-ს ცნობით, სროლისას არავინ დაშავებულა.

უწყება ადასტურებას იმასაც, რომ ბრალდებულებმა, ბანკის ფილიალზე ყაჩაღურ თავდასხმამდე, ორი მოქალაქე გაიტაცეს და მათივე კუთვნილი ავტომანქანა ჩამოართვეს. მოგვიანებით, თავდამსხმელებმა მძევლად აყვანილი ორივე მოქალაქე გაათავისუფლეს და შემთხვევის ადგილიდან გატაცებული ავტომანქანით მიიმალნენ.

მომხდარზე გამოძიება საქართველოს სისხლის სამართლის კოდექსის 179-ე (ყაჩაღობა), 236-ე (ცეცხლსასროლი იარაღის მართლსაწინააღმდეგო შეძენა-შენახვა) და 143-ე (თავისუფლების უკანონო აღკვეთა) და 353¹ (პოლიციელზე თავდასხმა) მუხლებით მიმდინარეობს.