ტყიბულის მუნიციპალიტეტის ინფორმაციით, სოფელ კურსებში, ბეროძეებისა და გოგოლაშვილების უბანში მეწყრული პროცესების განვითარების შედეგად 5 საცხოვრებელი სახლი დაინგრა.

მუნიციპალიტეტის ინფორმაციით, მომხდარს მსხვერპლი არ მოჰყოლია.

მეწყრული ზონიდან 38 ოჯახის ევაკუაცია განხორციელდა. დაშავებული არავინაა. მუნიციპალიტეტის განცხადებით, დაზარალებული ოჯახების სასტუმროებში განთავსებას ტყიბულის მერია უზრუნველყოფს.

"მეწყრულ ზონაში მობილიზებულია საგანგებო სიტუაციების მართვის სამსახურის იმერეთის სახანძრო-სამაშველოს ჯგუფები და ყველა შესაბამისი სამსახური.

შექმნილი ვითარებიდან გამომდინარე მუნიციპალიტეტში მოქმედებს ცხელი ხაზი: 599 27 32 50, 574 22 81 02," — ვკითხულობთ მუნიციპალიტეტის განცხადებაში.

ტყიბულის მუნიციპალიტეტში მეწყერის ჩამოწოლას საგანგებო სიტუაციების კოორდინაციისა და გადაუდებელი დახმარების ცენტრიც გამოემხაურა. სამსახურმა სოფელ კურსებში მყოფ მოსახლეობას მოუწოდა "თავი შეიკავონ გადაადგილებისგან და დაემორჩილონ ადგილზე მყოფ შინაგან საქმეთა სამინისტროს წარმომადგენლების მითითებებს".