"ევროკავშირმა თვითნებურად, არაპროვოცირებულად შეაფერხა საქართველო-ევროკავშირის ურთიერთობები, ბურთი არის ბრუსელის მოედანზე. მათ უნდა გამოასწორონ მათივე გაფუჭებული, ჩვენ მათ გაფუჭებულს ვერ გამოვასწორებთ", — ამის შესახებ შალვა პაპუაშვილმა ბრიფინგზე ნიკოლ ფაშინიანის ევროპარლამენტში გაკეთებულ განცხადებაზე კომენტირებისას თქვა. პაპუაშვილის თქმით, ფაშინიანი თავისი ქვეყნის ინტერესებიდან გამომდინარე საუბრობდა და საქართველოს ევროკავშირთან "თავისი ურთიერთობები" აქვს.

"ბატონი ფაშინიანი გახლავთ სომხეთის პრემიერმინისტრის, მისი ინტერესებიდან და როგორც სომხეთის ხელისუფლების წარმომადგენელი ისე საუბრობდა თავისი ქვეყნის ინტერესებთან დაკავშირებით. ...ეს გახლავთ სომხეთის და ევროკავშირის ურთიერთობების საკითხი. რა საკითხებზე მსჯელობენ, რა აქვთ სათხოვარი, მისამართი, ჩვენ ჩვენი ურთიერთობა გვაქვს ევროკავშირთან. ევროკავშირმა ძალიან კარგად იცის რა უნდა გააკეთოს, რომ აღადგინოს ურთიერთობები საქართველოსთან. ევროკავშირმა თვითნებურად, არაპროვოცირებულად შეაფერხა საქართველო-ევროკავშირის ურთიერთობები, ბურთი არის ბრუსელის მოედანზე. მათ უნდა გამოასწორონ მათივე გაფუჭებულს, ჩვენ მათ გაფუჭებულს ვერ გამოვასწორებთ. ჩვენი პოზიცია საჯარო და ღიაა. ...რაც შეეხება საქართველო-ევროკავშირის ურთიერთობას, ეს გააფუჭა ბრუსელმა, საკუთარ გაფუჭებულზე თვითონ უნდა აგოს პასუხი და ჩვენ მზად ვართ, რომ ეს ურთიერთობა დაუბრუნდეს სამუშო პროცესს", — განაცხადა შალვა პაპუაშვილმა ბრიფინგზე.

ცნობისათვის, გუშინ ევროპარლამენტში სიტყვით გამოსვლისას სომხეთის პრემიერმა განაცხადა, რომ "სომხეთის ევროკავშირში ინტეგრაციის გზაზე ამჟამად ყველაზე დიდი პრობლემა ევროკავშირსა და საქართველოს შორის პოლიტიკური დიალოგის გაყინული მდგომარეობაა".

"გულწრფელად უნდა ვთქვა, რომ სომხეთის ევროკავშირში ინტეგრაციის გზაზე ამჟამად ყველაზე დიდი პრობლემა ევროკავშირსა და საქართველოს შორის პოლიტიკური დიალოგის გაყინული მდგომარეობაა. საქართველო ჩვენთვის ევროკავშირისკენ მიმავალი გზაა. და ჩვენ ევროკავშირში სომხეთის გაწევრიანების პროცესის დაწყების შესახებ კანონი მივიღეთ მას შემდეგ, რაც საქართველომ ევროკავშირის წევრობის კანდიდატის სტატუსი მიიღო. ეს სომხეთის ევროკავშირში გაწევრიანების პერსპექტივას უფრო ხელშესახებს ხდიდა და ჩვენი მოლოდინი და თხოვნაა, რომ ევროკავშირ-საქართველოს კონსტრუქციული პროცესი განვითარდეს. ეს სომხეთისთვის ისეთივე მნიშვნელოვანია, როგორც საქართველოსთვის“, — განაცხადა სომხეთის პრემიერმა, ნიკოლ ფაშინიანმა ევროპარლამენტში სიტყვით გამოსვლისას ("ნეტგაზეთის" თარგმანი).