ნიკოლოზ ყიფშიძის სახელობის თბილისის რესპუბლიკურ საავადმყოფოს ახალი დირექტორი ჰყავს. სამედიცინო დაწესებულების დირექტორის თანამდებობაზე ჯავარა უგრეხელიძე დაინიშნა. ახალი დირექტორი თანამშრომლებს მიხეილ სარჯველაძემ წარუდგინა.

რესპუბლიკურ საავადმყოფოს ახალი დირექტორი, მედიცინის მეცნიერებათა დოქტორია და მრავალწლიანი პროფესიული გამოცდილება აქვს როგორც კლინიკურ, ისე ჯანდაცვის მენეჯმენტის სფეროში. გასულ წლებში, ის საქართველოს ჯანდაცვის სისტემაში სხვადასხვა მენეჯერულ პოზიციაზე მუშაობდა. 2024 წლის მარტიდან დღემდე სამედიცინო და ფარმაცევტული საქმიანობის რეგულირების სააგენტოში, სამედიცინო საქმიანობის რეგულირების დეპარტამენტის პროფესიული რეგულირების სამმართველოს უწყვეტი პროფესიული განვითარების მიმართულების ხელმძღვანელის პოზიციას იკავებდა. მანამდე კი, 2022-2024 წლებში, მუშაობდა აკადემიკოს ნიკოლოზ ყიფშიძის სახელობის ცენტრალური საუნივერსიტეტო კლინიკაში პერსონალის უწყვეტი განათლების ცენტრის ხელმძღვანელად, ასევე სხვადასხვა პერიოდში ეკავა დირექტორის მოადგილის, სამედიცინო მომსახურების ხარისხის უზრუნველყოფისა და სამედიცინო მენეჯერის პოზიციები.

ჯავარა უგრეხელიძე აქტიურადაა ჩართული აკადემიურ საქმიანობაში, იგი მოწვეული ლექტორია თბილისის სამედიცინო აკადემიასა და კავკასიის უნივერსიტეტებში. მისი სამეცნიერო ინტერესები ძირითადად კარდიოლოგიასა და ჰიპერტენზიის მიმართულებებს მოიცავს, ხოლო მისი ნაშრომები გამოქვეყნებულია საერთაშორისო და ქართულ სამედიცინო გამოცემებში.

მიხეილ სარჯველაძემ კლინიკის ყოფილ დირექტორს გაწეული სამსახურისთვის მადლობა გადაუხადა. გოგა მესხი საქმიანობას სოციალურ მომსახურების სააგენტოს დირექტორის მოადგილის პოზიციაზე გააგრძელებს.

ინფორმაციას ჯანდაცვის უწყება ავრცელებს.