The New York Times წყაროებზე დაყრდნობით წერს, რომ ირანის ქალაქ მინაბში სკოლის დაბომბვაზე პასუხისმგებელი აშშ-ია. გამოცემის თანახმად, შაჯარაჰი თაუბეჰის სკოლაზე "ტომაჰავკის" რაკეტით იერიში შეცდომით დამიზნების შედეგია. სამიზნე სკოლის მიმდებარე სამხედრო ბაზა იყო, თუმცა აშშ-ს ცენტრალურმა სარდლობამ თავდაცვის დაზვერვის სააგენტოს (DIA) მიწოდებული მოძველებული კოორდინატები გამოიყენა, რომლის მიხედვითაც სკოლის შენობა ჯერ კიდევ სამხედრო ობიექტად ითვლებოდა.

თეთრი სახლის პრესმდივანმა, კაროლინ ლივიტმა, დაადასტურა, რომ გამოძიება ჯერ კიდევ მიმდინარეობს. გამომძიებლები ცდილობენ დაადგინონ, რატომ არ გადამოწმდა მოძველებული მონაცემები ეროვნული გეოსივრცითი დაზვერვის სააგენტოს (NGA) სატელიტური ფოტოებით. ასევე მოწმდება ხელოვნური ინტელექტის ან სადაზვერვო პროგრამების შესაძლო ხარვეზი, თუმცა მაღალჩინოსნები ამ ვერსიას ნაკლებად სავარაუდოდ მიიჩნევენ.

მიუხედავად იმისა, რომ პრეზიდენტმა დონალდ ტრამპმა მომხდარში ირანი დაადანაშაულა, იერიშს მსხვერპლი მოჰყვა. ირანული მედიის ცნობით, დაღუპულია 175 ბავშვი, თუმცა ამ მონაცემების დამოუკიდებლად გადამოწმება ჯერჯერობით შეუძლებელია.