დედამ ყველაფერი ყველაზე კარგად იცის, განსაკუთრებით მაშინ, როცა ის კეტრინ ჰანია. ახლახან გავრცელებული ინფორმაციით დადასტურდა, რომ რაპუნცელის ახალ ადაპტაციაში დედა გოთელის როლს სწორედ ჰანი მოირგებს.

მანამდე ამ როლისთვის სკარლეტ იოჰანსონის შერჩევა იგეგმებოდა, თუმცა იმის გათვალისწინებით, რომ ორგზის ოსკარის ნომინანტი მსახიობი ახლო მომავალში ორ ფილმში (ბეტმენი 2 და ეგზორცისტი) მონაწილეობას გეგმავს, მან შემოთავაზებაზე უარი თქვა.

ფოტო: Getty Images/Disney

Deadline-ის ცნობით, ჰანთან მოლაპარაკებები მას შემდეგ დაიწყო, რაც Disney-მ ანიმაციური ფილმის ადაპტაციისთვის მთავარი როლის შემსრულებელი მსახიობები, ტიგან კროფტი (რაპუნცელი) და მილო მანჰეიმი (ფლინ რაიდერი) დაამტკიცა.

სულ ახლახან კი ინფორმაცია თავად ჰანმა, ინსტაგრამზე გამოქვეყნებული პოსტით დადასტურდა. ვიდეოში ის გვაჩვენებს თავის მაისურს, რომელზეც დედა გოთელის სურათია გამოსახული. ამასთანავე, მსახიობს სულ ახლახან შექმნილ ინსტაგრამის ანგარიშზე სახელად @MotherHahn აქვს მითითებული.

რაპუნცელის ახალი ადაპტაციის რეჟისორი მაიკლ გრეისია, რომლის ნამუშევრებს შორისაა მუსიკალური ბიოგრაფიული ფილმები Better Man The Greatest Showman და Better. სცენარის ავტორი კი ჯენიფერ რობინსონია, ფილმების Do Revenge-ისა და Thor: Love and Thunder-ს შემქნელი.

შეგახსენებთ, რომ ანიმაციური ფილმი რაპუნცელი 2010 წელს გამოვიდა და დაახლოებით $582 მილიონი დოლარი გამოიმუშავა. ამასთანავე, ფილმში შესრულებულმა სიმღერებმა ოსკარის და გრემის ნომინაციებიც მოიპოვა.

ფოტო: Getty Images

რაც შეეხება კეტრინ ჰანს, ის სულ ახლახან Apple-ის სატელევიზიო სერიალ სტუდიოში, მაია მეისონის როლში, ვიხილეთ. ამ უკანასკნელით მან ემის ნომინაცია მიიღო.

რაპუნცელის გამოშვების თარიღი ჯერჯერობით უცნობია.

ამავე თემაზე: