შინაგან საქმეთა სამინისტრო დღეს, 5 მარტს თემქის პოლიციის შენობასთან მომხდარ ინციდენტთან დაკავშირებით აცხადებს, რომ 112-ზე შევიდა შეტყობინება მოქალაქისგან თვითმკვლელობის განზრახვის შესახებ. განცხადების თანახმად, მოქალაქე აცხადებდა, რომ იგი პოლიციელთა მხრიდან ზეწოლის ობიექტია.

შსს-ს ცნობით, მანამდე, იგივე მოქალაქემ დღის განმავლობაში თემქის პოლიციას მიმართა და განაცხადა, რომ მის ოჯახის წევრებს ემუქრებოდნენ. დაიწყო გამოძიების მუქარის ფაქტზე, რომლის ფარგლებში იგი გამოიკითხა.

უწყების მტკიცებით, თვითმკვლელობის შესახებ ცნობის მიღებისთანავე პოლიციამ დაიწყო მისი ადგილსამყოფელის დადგენისა და სიცოცხლის უსაფრთხოების მიზნით შესაბამისი ღონისძიებები.

"თემქის პოლიციის შენობასთან დაახლოებით 19 საათისთვის მოქალაქე დაბრუნდა მედიასაშუალების წარმომადგენლებთან ერთად და თავის დაწვა სცადა". დაშავებული მოქალაქე პროფილაქტიკური სამედიცინო კვლევისთვის საავადმყოფოში გადაიყვანეს.

ტელეკომპანია რუსთავი 2-ის ინფორმაციით, მოქალაქე აცხადებს, რომ პოლიციელები მას ნარკოტიკების ჩადებით ემუქრებოდნენ, რის გამოც პროტესტის უკიდურეს ფორმას მიმართა.

შინაგან საქმეთა სამინისტროს თბილისის პოლიციის დეპარტამენტის გლდანი-ნაძალადევის სამმართველომ თვითმკვლელობამდე მიყვანის ფაქტზე გამოძიება სისხლის სამართლის კოდექსის 115 მუხლით დაიწყო.