თელავში 8 თვის ორსული ქალი გარდაიცვალა. ინფორმაციას ადგილობრივი მედია "მთავარი ამბები კახეთიდან" ავრცელებს. მათი ცნობით, დაიღუპა ნაყოფიც.

გარდაცვლილის მეგობრები ვარაუდობენ, რომ მიზეზი სისხლძარღვებში წარმოქმნილი თრომბი გახდა. ორსულს ჯანმრთელობის პრობლემები ჰქონდა და ექიმის მეთვალყურების ქვეშ იმყოფებოდა.

"ბოლო პერიოდში მკურნალობდა კიდეც, თუმცა თრომბი მაინც განვითარდა. სახლში იყო და შეტევა სწორედ იმ დროს დაეწყო", — ამბობს ერთ-ერთი ახლობელი.

არსებული ინფორმაციით, შემთხვევის დროს სასწრაფო-სამედიცინო დახმარებაც გამოიძახეს, თუმცა ექიმებს ქალი უკვე გარდაცვლილი დახვდათ.

კლინიკაში, სადაც ორსული სამედიცინო აღრიცხვაზე იმყოფებოდა, ამ დროისთვის კომენტარი არ გაუკეთებიათ.