პერსონალურ მონაცემთა დაცვის ინსპექტორის 2018 წლის ანგარიშის მიხედვით, შინაგან საქმეთა სამინისტროს თანამშრომელმა მსხვერპლის მისამართი მოძალადე მშობლებთან გაამჟღავნა. როგორც ანგარიშიდან ირკვევა, მსხვერპლს არ სურდა ამ ინფორმაციის გამხელა და ამის შესახებ ინფორმირებული იყო სამართალდამცავი უწყებაც.

"განმცხადებელი მიუთითებდა, რომ სამინისტროს თანამშრომლებს მისთვის არ განუმარტავთ შემაკავებელი ორდერის შინაარსი და მიუხედავად იმისა, რომ ხელი მოაწერა ორდერს, არც კი შეუნიშნავს, რომ მასში ასახული იყო ფაქტობრივი საცხოვრებელი მისამართი. განმცხადებელი ასევე განმარტავდა, რომ მშობელთა მხრიდან დევნის გამო იმყოფებოდა აღელვებულ მდგომარეობაში და არ ჰქონდა შესაძლებლობა, სრულად გაეაზრებინა ყველა პროცესუალური დეტალი, რომელიც პოლიციის თანამშრომლებმა განახორციელეს", — აღნიშნულია ანგარიშში, სადაც ასევე ვკითხულობთ, რომ საპირისპიროს ამტკიცებდა სამინისტრო.

ინსპექტორის რეკომენდაციით, მსგავს შემთხვევებში მსხვერპლი შესაძლოა იყოს აღელვებული და სათანადოდ ვერ აღიქვამდეს მონაცემთა დამუშავების მიზნებსა და მოსალოდნელ შედეგებს.

"მნიშვნელოვანია, არსებობდეს მექანიზმი, რომელიც მაქსიმალურად უზრუნველყოფს მსხვერპლისათვის მიწოდებული ინფორმაციის სიცხადეს, მისი ნების თავისუფალ გამოვლენასა და მტკიცებულების შექმნას მონაცემთა სუბიექტის ჯეროვანი ინფორმირების თაობაზე", — აღნიშნულია ანგარიშში.