პატრიოტთა ალიანსის წევრს, ემზარ კვიციანს იმედი აქვს, რომ ქართული ოცნების თავმჯდომარე, ბიძინა ივანიშვილი შეყვარებული წყვილების აღმრიცხავ ცენტრს დააფინანსებს. ამის შესახებ მან ტელეკომპანია მაესტროს ეთერში ისაუბრა.

"დიდი იმედი მაქვს, ბატონი ბიძინა ივანიშვილი, რომელიც ასე თავგამოდებით არის ქველმოქმედი და არის ქართველი ხალხის გვერდში ამდენი წელიწადია, ალბათ, ერთი კაი მსუყე ჩანარიცხს გააკეთებს", — ამბობს კვიციანი.

მისივე თქმით, ცენტრში რა ოდენობის თანხა ჩაირიცხა, ინფორმაცია არ აქვს, თუმცა იმედოვნებს, რომ ემიგრაციაში მყოფი წარმატებული ბიზნესმენები ცენტრისთვის თანხას გაიღებენ.

"ყველა ქველმოქმედი, ყველა ქართველი და ყველა ის ადამიანი, ვისაც ქართველების და საქართველოს წინსვლა და გაძლიერება უნდა, ყველა მიიღებს მონაწილეობას, მათ შორის, დეპუტატები", — დასძენს კვიციანი.

საჯარო რეესტრმა შეყვარებული წყვილების აღმრიცხავი ცენტრი 2019 წლის 18 თებერვალს დაარეგისტრირა. ემზარ კვიციანის განმარტებით, ეს ცენტრი დაეხმარება ისეთ წყვილებს, რომლებსაც ოჯახის შესაქმნელად ფინანსური რესურსი არ აქვთ. მისი თქმით, აგენტები ივლიან, რომლებიც გაიგებენ, სად არიან ასეთი წყვილები, მათ აღრიცხვაზე აიყვანენ და შემდეგ გაუწევენ ფინანსურ დახმარებას. რაც შეეხება ბიუჯეტს, მისივე თქმით, ფულს ემიგრანტები ჩარიცხავენ.