"ვისურვებდი ღირსეული სასულიერო პირების რიგი დადგეს მატროსოვის ციხესთან", — ასე გამოეხმაურა ჭყონდიდის მიტროპოლიტი პეტრე ცაავა მსჯავრდებული დეკანოზის გიორგი მამალაძის ზიარების საკითხს.

მისი განცხადებით, ზიარების საკითხი იმ მამაომ უნდა გადაწყვიტოს, რომელიც აღსაზრებას ჩაიბარებს და საპატრიარქოს განცხადებები, მამა გიორგი მამალაძის "უზიარებლობით დასჯის" შესახებ არასამართლიანი და არაქრისტიანული იყო.

დეკანოზ გიორგი მამალაძის ოჯახის წევრების მოთხოვნა მისი ზიარების შესახებ საპატრიარქომ ეკლესიაზე ზეწოლად შეაფასა. თუმცა, პატრიარქმა გადაწყვიტა დეკანოზის ზიარების უფლება მისცეს იმ მღვდელმსახურებს, ვინც პასუხისმგებლობას მხოლოდ საკუთარ თავზე აიღებენ.

აქცია საპატრიარქოსთან ოჯახის წევრებისა და მხარდამჭერების ორგანიზებით 4 თებერვალს გაიმართა. დეკანოზის ძმა, თორნიკე მამალაძე განმარტავდა, რომ დაკავებული საპატრიარქოს გარკვეული ჯგუფების ტყვეა. ის დეკანოზის ზიარებას და მის დაუყოვნებლივ გათავისუფლებას ითხოვდა. მამალაძის მხარდამჭერებმა საპატრიარქოსთან კარვები გაშალეს. მათი თქმით, საპატრიარქოსგან რეაგირებას დაელოდებოდნენ, შემდეგ კი გეგმას დაისახავდნენ.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.

გაიგეთ მეტი: ციანიდის საქმე — მოკლედ