საპატრიარქოში აცხადებენ, რომ დეკანოზ გიორგი მამალაძის ოჯახის წევრების საპროტესტო აქცია მისი ზიარების მოთხოვნით ეკლესიაზე ზეწოლაა. მათი თქმით, ეს მიუღებლად მიაჩნიათ.

"საპატრიარქოს მიმდებარე ტერიტორიაზე კარვის დადგმამ იმ მოთხოვნით, რომ მისი ძმა, დეკანოზი გიორგი მამალაძე აზიარონ, საერთოდ, საერო ხასიათი და ეკლესიაზე ზეწოლის თანამედროვე სახე შესძინა ამ საქმეს", — განმარტავენ საპატრიარქოში.

მათივე თქმით, ვინაიდან დეკანოზი თავს უდანაშაულოდ მიიჩნევს სასამართლო კი მას დამნაშავედ აცხადებს პატრიარქი მღვდელმსახურებს უფლებას აძლევს სურვილის შემთხვევაში აზიარონ ის, მაგრამ ეს მათი პირადი გადაწყვეტილება და პასუხისმგებლობა იქნება.

აქცია საპატრიარქოსთან ოჯახის წევრებისა და მხარდამჭერების ორგანიზებით 4 თებერვალს გაიმართა. დეკანოზის ძმა, თორნიკე მამალაძე განმარტავდა, რომ დაკავებული საპატრიარქოს გარკვეული ჯგუფების ტყვეა. ის დეკანოზის ზიარებას და მის დაუყოვნებლივ გათავისუფლებას ითხოვდა. მამალაძის მხარდამჭერებმა საპატრიარქოსთან კარვები გაშალეს. მათი თქმით, საპატრიარქოსგან რეაგირებას დაელოდებოდნენ, შემდეგ კი გეგმას დაისახავდნენ.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.

გაიგეთ მეტი: ციანიდის საქმე — მოკლედ