მეცხრე მოწვევის პარლამენტის საგაზაფხულო სესია დღეს, 4 თებერვალს იხსნება. 6 წლის შემდეგ, პირველად პარლამენტი მუშაობას არა ქუთაისში, არამედ თბილისში განაახლებს.

პარლამენტის ახალი რეგლამენტით, საქართველოს პარლამენტის თავმჯდომარე ირაკლი კობახიძე დეპუტატებს პირველად პარლამენტის საქმიანობის ყოველწლიურ ანგარიშს წარუდგენს და მომდევო წლის სამოქმედო გეგმასაც წარადგენს.

მის სიტყვით გამოსვლას საქართველოს პრემიერ-მინისტრი მამუკა ბახტაძე, მინისტრები, ქალაქ თბილისის მერი კახა კალაძე დაესწრებიან.

ირაკლი კობახიძის ყოველწლიური ანგარიში პარლამენტის მიერ გაწეულ საკანონმდებლო და საზედამხედველო საქმიანობას, საგარეო მიმართულებით განხორციელებულ სამუშაოს, ინსტიტუციური გაძლიერების კუთხით მიღწეულ პროგრესსა და სამომავლო გეგმებს დაეთმობა.

საგაზაფხულო სესიაზე საქართველოს პარლამენტი ახალი რეგლამენტით იწყებს მუშაობას, რომლის ფარგლებშის მინისტრთა საათი იწყებს ამოქმედებას. დეპუტატები 7 თებერვალს განათლების, მეცნიერების, კულტურისა და სპორტის მინისტრს, მიხეილ ბატიაშვილს მოუსმენენ, 8 თებერვალს კი დეპუტატების წინაშე ინფრასტრუქტურისა და რეგიონული განვითარების მინისტრი მაია ცქიტიშვილი წარდგება.

ახალი რეგლამენტი საკანონმდებლო ორგანოში პრემიერ-მინისტრის წლიურ გამოსვლასაც ითვალისწინებს. დეპუტატები მთავრობის ხელმძღვანელს ივნისის ბოლომდე მოუსმენენ, მანამდე კი, სავარაუდოდ თებერვლის ბოლომდე, კანონმდებლების წინაშე წლიური ანგარიშით ახლად არჩეული პრეზიდენტი სალომე ზურაბიშვილი წარდგება.