უილიამ შექსპირის უკვდავი ტრაგედიის, რომეო და ჯულიეტას ფინალური სცენა, როგორც წესი, სპექტაკლის ერთ-ერთი ყველაზე ემოციური მომენტია ხოლმე. თუმცა, თურქეთის ქალაქ იზმირში ჩატარებულ სპექტაკლზე მოვლენები განსხვავებულად განვითარდა, როცა სცენაზე დაუპატიჟებელი სტუმარი გამოჩნდა. შემთხვევა ბორნოვას ღია ცის ქვეშ მდებარე თეატრში მოხდა.

როდესაც დადგმა ფინალურ სცენას მიუახლოვდა, მაყურებელი ჩუმად უყურებდა სცენაზე უსულოდ მწოლიარე რომეოსა და მის გვერდით ატირებულ ჯულიეტას. ამ დროს კი, უეცრად, სცენაზე კატა გამოჩნდა. იგი მშვიდად მიუახლოვდა რომეოს როლის შემსრულებელს, თავთან მოუკალათდა და თმაზე თამაში დაუწყო.

იხილეთ ვიდეო:

მოულოდნელი შეფერხების მიუხედავად, რომეოს შემსრულებელს წამითაც არ შეუცვლია პოზა, ხოლო ჯულიეტას როლის შემსრულებელმა თამაში და ქორეოგრაფიული ნომერი უშეცდომოდ, პაუზის გარეშე განაგრძო.

მაყურებლის მიერ გადაღებული ვიდეოები სოციალურ ქსელებში ვირუსულად გავრცელდა. ინტერნეტმომხმარებელთა ნაწილი კატის ქცევამ მოხიბლა, დანარჩენები კი მსახიობებს სიმშვიდის შენარჩუნებისთვის აქებდნენ.